Vangpui Kut chu October ni 5 (Nilaini) leh ni 6 (Ningani) hian hman tura ruahman a ni a, a buaipuitu sub-committee te pawh an tang nasa hle ani. A hmun atan Baldwin Boys High School, Hosur road ani anga, hemi hmunah hian kumdangah pawh BMA hian programme eng eng emaw kan lo hmang tawh thin a a nuam thin hle. 5th October ah hian infiamna chi hrang hrang hmanga section pali te inel a ni anga, a ni hnihna 6th October chu Kut Ni niin chawhma lamah infiamna hlimawm chi nena hun hman tur a ni ang.
Hengte hi kan infiamna tura ruahman chu an ni e –
Volleyball (Mipa leh hmeichhia),
Basketball (Mipa leh hmeichhia),
Tug of War,
Balloon Shot-put,
Football Passing,
Lawngkar,
Arm Wrestling,
Insuknawr,
Water Race,
Inkhawibah,
Opposite Shotput,
Slow Motion Race
Kut ni (6th October) a inelna leh items dangte chu – Essay Writing (Thupui: ‘Mizote leh Thianghlimna’. Thehluh hun hnuhnung atan October ni 2, 2011 a ni). Solo – Mipa: A teuh lo mai (Sanglura hla), Hmeichhia: Aw Zoram nuam suihlung phang lo la (Daduhi hla). Hla phuah: Sual dona lampang hla
Essay leh hla phuah a pakhatna te hi Chhinglung Magazine-ah dah telve an ni ang a. Tin, Chheih lam intihsiak hlimawm tak mai kha a awm leh anga. Kan la neih ngailoh Comedian Search pawh Section tin atangin pakhat theuh neih tur a ni bawk. Naupang tan poem phuah, thawnthu tawi ziah leh milem ziah leh cheimawi a awm bawk anga, henga a ti thate chu an thil ziah emaw siam emaw chu Chhinlung magazine ah tel ve a ni ang. Heng bakah hian chanchin chiang zawk chu remchang veleh kan rawn tarlang dawn nia.
