Zankhat chu ka lehkha zir peih lo, engmah tiloa awm mai mai aiah tiin ka dictionary neih ang ang leh ka file neih ang ang te ka keu lawr vel mai mai a, ngaihtuah mang hlei lova ka keu lawr ka keu lawr lai chuan American Chemist ropui lutuk Linus Pauling a tawngkam phuhchhuah ropui ka tih lutuk , “The best way to have a good idea is to have lots of ideas.” tih chu ka zuk keu chhuak hlawl mai a. Chu chuan chawplehchilhin ka ngaihtuahna chhungril a rawn luhchilh nghalin keimahah nasa takin chona min siam nghal a. Chu thu chuan ka rilru a luah mek lai chuan BMA AW ah thalaite chona article tha lutuk chhiar tur a lo awm leh hlauh a. Ka rilrua awm lai mek a nih avang leh tun hma atang tawha ka lo vei tawh thil a nih avangin phurna nasa tak min siam a. Ka chhiar chhuah veleh a ziaktupa (Rev. C. Vanlaldika) ka message nghalin, a chhanna angreng ka ziah tur thu ka hrilh nghal a. Chumi, thalaite min chona challenging tak chu thalaite aiawh pawh ni em em hran chuang lovin ka theih ang tawkin rawn chhan ka tum dawn a ni.
British novelist ropui, Virginia Woolf chuan, thil dang zawng aia ngaihtuahna thuk leh ril (critical thinking) in ram hmel a sawi danglan theih zawkzia chu “Odd how the creative power at once brings the whole universe to order” tiin a sawi a. A ni taka thaliaite chona tih article lo ziaktuina a rawn sawi ngaihtuahna thuk leh ril (critical thinking or Rational thinking) nei mi tluka kan zoramin a mamawh tumah an awm lova. He ngaihtuahna ril zempui ‘Creativity’ tih hi Latin tawng ‘Creatio’ tih atanga lakchhawn a ni a, a awmzia tak chu ‘thil satliah emaw, suangtuahna satliah mai mai hmanga thil tih nilova, suangtuahna tha leh dangdai, ril leh thuk, thinlung chhungril ber ngaihtuahna atanga chhuak ngeia thil duanchhuah ti ila’ a sual lutuk ka ring lo e. Tun hnaiah ziaktu hrang hrang ten kan zoramina a mamawh chi hrang nia an hriatte chanchinbu kaltlangin an rawn tlangzarh thin a. Heng thil zawng zawng hi kan mamawh lo e ka tihna phei zawng chu a ni lo. Nimahsela, chung zawng aia kan ramin mamawh zawk kan nei a. Chu chu – mi zir sang, degree nei sang satliah ringawt nilovin; mifing, mi ril leh mi thuk, sap hovin ‘Philosopher’ an tih ang tak tak mi hi a ni a. Greek miffing Aristotle thu leh hlate leh English pachal John Locke te thu leh hla (Idea or theory) kan zir thin ang hian zirlaibua zir tlak theory vawrhchhuah thei zofate zingah hian awm thei se zawng kan ram hian khawvel denchhuah hun hi a la nei mawlh ngei ang le. Tunlai khawvel competition sang tawh takah hian thil chhinchhiah thei ringawt emaw, by-heart thei ringawt emaw hriatna (knowledge) nei tha ringawt te hian kan ram hi an chhanchhuak zo tawh dawn lova. Khawvel hriata kan ram leh hnam pho lang tur hian mi thuk leh ril (Philosopher) te chuah hi kan ram nghahfak an ni a, chung ang mite kan ramin kan hmu zo lo a nih zawngin boral mai lo chu kan ram hian hmabak a nei lo a ni.
Khawvel pum anga thlirin Asia mite hi he thil thar ngaihtuah chhuah theihna thuk leh ril (creative idea) nei loa sawi thin an ni thin a. Chung zingah chuan keini zofate hi kan bang bik lo mai nilovin a nei lo ber hlei hleite kan ni hial awm e. A chhan leh vang tam tak a awm thei ang a, mahse chung zinga buk rit ber chu kan culture vang hi a nih a rin theih awm e. A chhan chu pi leh pute atanga kan inzirtir danah ‘Aia upate thu chu eng thu pawh nise, a kip a kawia zawm tur’ tih leh ‘Mahnia upa zawkte thu thua awm tur a ni’ tih zawnga inzirtir thin kan ni a. Hei hian aia upate zah nachang min hriattirin mizo khawtlang nunah rah duhawm tak a chhuah lain kawng lehlama ngaihtuah chuan hei hian naupangte leh thangthar zel teah mahni tawka ngaihdan bik an neih lohtir phah a, chu chuan anmahnia finna leh thiamna inphumru an hupbeh sakin, mahni inrintawkna an tlakchhamtir phahin an zirtirtute`n an zirtir ang ang kha a zawng a zain dik famkim vekah an ngaihtirin an zirnaah pawh ngaihtuahna an hman tlem phah a. Hei hi a dik a ni tih ka chianna em em pakhat chu nikum ka sikul luhna hlui (Synod Higher Secondary School) ah Science zirlai thenkhatte nen an zirlai ‘Theory of Evolution’ leh ‘Big Bang Theory’ chungchangah te kan inhnial fiam ve thin a. Ka thian, Science zirlai thenkhat zawhna ka zawh changing min chhandan tlangpuiah chuan Charles Darwin theory atanga chhuta a vawrtawpa an chhut chhuah – mihringte hi zawng thlah kan ni tih chu an awih lo vek a. Mahse, a bulthum ‘Animal Kingdom’ leh ‘Plant Kingdom’ tih te chu Science thudik ang hrimin an awih leh vek thung si a. Chutiang bawk chuan suangtuahna hmanga lei leh van insiam dan’Big Bang Theory’ chu thudik pumhlum (100 %) veka dik nia ngai leh vekin kan Bible nen pawh a inremloh zia an chhut pha ngai lo reng reng a. Khawvel hi kum maktaduai tam tak ni lovin kum sang ruk vel leka upa a ni han ti tel leh phei ila chuan jail a khung tlak hialah min ngai ngei ang le. Mahse, chutiang lampang chu inhnialna butut a chawhchhuah leh dawn avang leh Bible pawmtute zingah ngei pawh ngaihdan pahnih a pianchhuahtir leh theih dawn avangin chulam chu duhtawk mai ila. Chutiang vel chuan ngaihdan fumfe pawh nei loin a lai laklawhah an thle tawn vel mai mai a ni. Heta tanga thil langchiang tak chu Synod-a zirlai maite chauh nilovin zoram hmun hrang hrang atanga ka zirlaipui zawng zawng deuhthawte hian he kan culture avang hian kan zirlaiah chikna leh mahnia thudik hailan tak tak tumna min lakkiam sakin, mahni ngaihdan ai chuan midangte ngaihdan min tawmtir zawk tin nitein a hriat theih a. Hei hian a rahchhuah chu inhrilhhriat nawn leh hranpa ngai kher lovin a chhunga chengte hi a hretu vekte kan ni e.
Tuna kan thupui chai lai hi ram hnuk khawih thil tak tak a ni a. Mitin mai hian chik taka kan ngaihtuah chian a pawimawh em em a ni. Theih phei chu nise B.M.A. hmingin emaw, M.S.A. hmingin emaw sawikhawmna hun hi buatsaih ni ta se. A nih loh vek paw`n tun hnaiah Book Club din rawtnate a lo awm a, chumi pawl thar bultum chuan sawihona (Group Discussion) te hi awmthei se rah duhawm tak a chhuah ngei a beiseiawm. A tawp ber nana kan tarlan duh chu kan ram tluchhe mek tungding leh tur hian khua a la tlai loa, a bul atanga a tawp thlenga ke pen ngam tur thalai eng emaw zat kan la awmin, kan rilru puthmang dik tawk tawhlohnaah te inlamletin he chona rawn ziaktuina a beisei ang ngei a, ngaihtuahna ril leh thuk ‘Rational thinking’ neih ngei tum thalai engemawzat kan rawn lang tharin, kan rawn pen chhuak tan a. Zoram khawvela ka thalaipui leh ka zirlaipui zawng zawngte aiawhin hnehna ka rawn puang a ni e!!!.
(He article rawn ziaktu Tv. K. Remruatfela hi K.L.E. Law College ah 1st. Sem LLb. 5 yrs. Course a zir mek a ni.)
