Rawpui khua a mi, Lalrozâma (5), pian tirh atanga ek kawng ping (Rectourethral Fistula) chu Narayana Hrudayalaya Hospital, Bangalore-ah tluang taka zai zawh a ni. Lalrozama hi nimin 25th August khan damdawiin atangin a chhuak a, 26th August hian Mizoram lam panin an haw ang.
Zâmzama, naupang duhawm leh fel tak hi a Pa leh a Putea ten August ni 9 khan Bangalore an rawn chhuk pui a, Rev. C. Lalmuankima (Registrar, UTC) BMCF President in lo mikhualin, August ni 11 khan Narayana Hrudayalaya damdawiinah hian admit a ni a (He damdawiin hi Lalngaihawmi (13) tluang taka an zai na hmun kha a ni). August ni 17 khan doctor thiam tak tak pathum, Dr. Ashley J. D’Cruz leh Dr. Manjula leh Dr. Pavithra ten Zâmzama hi an zai ta ani.
Zâmzama hi damdawiin a awm atangin a Pa leh a Putea ten an awmpui thei reng a, tin, Nl. Jenny Vanlalpari Hnamte (Fin. Secretary, BMA) in a tul apiangah a buaipui a, Rev. PC Lalduhawma’n veivahna lamah a hun chep tak karah tlawmngai takin min tanpui thin bawk a, an chungah kan lawm hle a ni.
Damdawiin (Narayana Hrudayalaya Hospital) awmna hi Bangalore Mizo Inkhawmna (Wesley Church, Coles Park) atangin 30kms vel a hla a ni a, khaw pawn daihah a awm avangin inkan leh inbuaipui hi a hautak tham em em a ni. He damdawiinah hian tunah hian Mizo hmeichhe naupang, kum 1 leh thla riat mi, Jennifer chu enkawl leh mek a ni bawk.
Zâmzama hi naupang duhawm leh fel deuh mai a ni a, a nui reng maia a bula awm a nuam in a ngaihawm dawn hle a ni. Anmahni tawngtaisaktu te, sum leh pai leh tha leh zung seng tu te leh tanpuina hrang hrang petu zawng zawngte hnenah BMA chuan lawmthu a sawi e.
Left to Right: Pi Singthangpuii, Pi Saibuangi, Nl. B. Lalthakimi, Rev. C. Vanlaldika (President, BMA), Zâmzama, Rev. C. Lalmuankima (President, BMCF), Rev. PC Lalduhawma
