Lalngaihawmi (13) Khawhai khua, Narayana Hrudayalaya Hospital-a 23rd July 2010 a admit chu 3rd August 2010 khan hlawhtling taka zai a nih hnuin 11th August khan a nuteii nen Mizoram lam an pan ta a ni. Lalngaihawmi kha doctor thiam tak tak pathum – Dr. Ashley D’Cruz, Dr. Sanjay Rao leh Dr. Manjula ten an zai a. An zai hlawhtling hle niin a lang, an zai zawh hnuin damdawiinah pawh a awm rei vak lo a, tin a chhuak kha chu a tha chak viau bawk. Mizoram sawrkar leh helai Bangalore Mizo Association member ten nasa taka an enkawlna hi a ropuiin a lawmawm hle a ni.
Tunah hian Bangalore Mizo khawtlang chuan naupang duhawm tak, kum 5 mi Lalrozama, Rawpui khua chu kan mikhual leh mek a. Ani hi mawngping bawk a ni a. August ni 10 khan Bangalore an lo thleng a, a pa leh an chhung mipa pakhat in an lo kalpui a. Rev. C. Lalmuankima ten lo mikhualin, August ni 11 khan Narayana Hrudayalaya damdawiinah kan Patron Pu B. Kapthuama leh kan Finance Secretary Nl. Jenny Vanlalpari leh member thenkhatten an va admit leh a ni.
Zamzama hi Thawhtanni (16th Aug.) zing lamah hian zai tura ruahman a ni a, tluang taka doctor ten an zai leh kan beiseiin kan tawngtaina a ni. Anni hi damdawiin bula mikhual thlennaah an thleng a, a ziaawm viau. Zamzama hi a mawngping mai niloin a kut zungpui phir pawh zai tura tih a ni. Tluang taka zai a nih theih nan kan tawngtaipui theuh dawn nia.
Zamzama te inenkawlna leh thil tul atana hman turin mi tam takin tanpuina an pe a, tin thawhlawm bawm siam a ni bawk a. Hei hi BMA sum a nih loh avangin kan President Rev. C. Vanlaldika, Vice President Tv. Madawnga Hauhnar leh Secretary Tv. Laldinmawia ten an dawngin an enkawl thung a ni. A hmaa kan lo tihdan ang bawkin anmahni enkawlna tul apiangah hman a ni dawn ani. Thawhlawm leh tanpuina hi a pek theih reng a, fel taka chhinchhiah niin, a pe duhte chuan engtiklai pawhin pek theih reng a ni e.
Zamzama pa kawmna hi BMA Aw, 15th August chhuakah chhiar theihin a awm e.
Hriatchian duh nei tan:
Rev. C. Vanlaldika, President BMA – +91 99023 27870
Mawngping tih tawngkam hi visitors thenkhatin a tuartu hmakhua an ngaih vangin hemi website ah pawh hian hmanglo turin rawn ngen ani a, mahse BMA Executive Committee in a rel angin ‘Mawngping’ tih tawngkam ngei hi thil anih na anga sawi tlang mai tha a tih zawk vangin hman a ni. Visitors ten he information hi in lo chhuah chhawng duh anih chuan khawngiahin Admin lam rawn contact hmasa turin BMA web team chuan a ngen a che u.
