Lalngaihawmi (13), Khawhai khua ami chu a piantirh atanga ek kawng fello niin, ek kawng siamchawpa hun rei tak a awm hnuin tunah hian a tha zawk beiseiin Narayana Hrudayalaya, Bangalore-ah zai turin admit a ni.
He Mizo hmeichhe naupang khawngaihthlak tak chanchin hi Dr. Lalrinawmi Ralte (Pi Nuteii), Professor, United Theological College chuan Khawhai lo bial tawh Pastor H. Lalhmingmawia hnen atangin a lo hria a. A rilru nasa takin a khawih a, a enkawl leh doctor thiam zawk te ruai turin hma a la ta a ni.
Lalngaihawmi hi a nuteiin 20th July khan Bangalore a rawn thlenthlakpui a. Dr. Lalrinawmi Ralte chuan lo thlengin 23rd July khan kan Patron Pu B. Kapthuama leh Pi Hmangaihi te nen tuna a awmna damdawiinah hian an va admit ta a ni. Lalngaihawmi te rawn thlen hma hian he damdawiin hi Mizoram doctor Pu Saia leh Pi Nuteii te hian an lo va en hmasa tawh bawk a, tin, a enkawltu tur doctor ngei pawh an lo va hmu tawh bawk a ni.
Tunah hian Bangalore Mizo Association chuan a theih ang angin tanpui dan kawng a ruahman bawk a. A awmpui leh tanpuina kawngah member te tlawmngaihna a ngen nghal bawk e. Kan damlo mikhual te hian tawng an thiam lo a, kawng tam takin inenkawlna kawngah harsatna a awm theih avangin, kan nulate (a bikin) Lalngaihawmi awmpui thei tur kan awm chuan BMA President Rev. C. Vanlaldika, Secretary Tv. Laldinmawia Hnamte te hnenah in report theih a ni.
Tin, sum leh paia tanpuina kawng pawh siam a ni a. Hetiang hian BMA chuan ruahmanna a siam: Bangalore Mizote inkhawmna Biakin Wesley Church kawtah Tanpuina Bawm hun a ni anga, tin he Bawma thlak remchang lo te chuan BMA President Rev. C. Vanlaldika hnenah pek theih a ni ang.
He tanpuina hi damlo awmpuitute leh buaipuitute veivahna leh ei leh in atan hman a ni ang. An mahni sum leh paia tanpui duhte chuan Pi Hminghlui (Lalngaihawmi nutei) hnenah pek mai tur a ni.
Hrechiang duh te tan a hnuaia hming ziakte hi a biak theih e.
Dr. Lalrinawmi Ralte – +91 94498 19757
Rev. C. Vanlaldika, President BMA – +91 99023 27870
