BMA SILVER JUBILEE KHARNA PROGRAMME

R.Lal Rinawma, Chairman, Silver Jubilee Celebrations Committee

April thla a Silver Jubilee lawmna puanzar hawnna programme kan neih zawh khan hlimna tam takin min tuam ngei a. Mahse, October ni 2 programme nei leh tur chuan hupphurhnain min chim tel bawk a.  Kan memberte mit kan tlinglo palh ang tih hlauhna a lian thin.  A hun a hnai tawlh tawlh a Mizoram Chief Minister meuh khuallian anga tel tur phei chuan min tih phur rualin a boruak a ti rit tel a.  Ani Pu Lal Thanhawla lah chu han dawr apiangin kan programme a tel amah leh a nupui Pi Rii phurzia a hriat reng mai si.

Tichuan, kan hotupa zu rawn zui thlain Pu Rotea nen kan pawnthuah kan rawn khai lut ve a,  Lore khawpui kan lo huang kai a, BMA President, Pi Lalrinpuii leh a hote chuan mawihnai taka min lo hmuak hmel kan hmuh chuan lawmna a sang danglam hle mai.  Kan Chief Minister kawmna hun duhawm tak kan nei thei leh kan ram chungchang thil tam tak kan sawipui bakah Mizoram House kan neihna tur hmalakna kan sawiho hnu chuan kan CM ber hian kan hriat phak baka hma a lo lak nasatzia a lang chiang hle mai.  Lawmna tur bawk a ni.

October ni 2 a lo ni a, kan ruahmanna engkim beisei dan thlap niin ka hria.  Kan programme tan hma zing lamah Vidhan Soudha-ah Karnataka Chief Minister kan pu in a kawmnaah Pu Rotea nen kan zui ve a, chumi a lo chhanna chuan min ti thlamuang em em mai, a Bangalore khawpuiah hian Mizoram House a la ding ngei dawn tih hi kan chiang ta a ni. Lawmna bawk a ni.   Hall-ah kan han lut a, kan hriattur thil pawimawh zualte kan hruaitu, Pi Lalrinpuii’n a han zam chhuak zung zung a, hun la hek silovin a khawih kim viau si.  Chutah Rev. Dr. F. Hrangkhuman hunserh a rawn hmang a, a thuchah tawi point 2 chauh si tawi fel taka a sawi chhuah thuchahte kha chhinchhiah reng tlak a ni.  Kan guests of honour pahnih zinga pakhat, Pu Rin Sanga a lo tel ve theilo erawh chuan kan hlimna a ti kim lo deuh pawh a. Pu Rotea kan zinga a awm hrim hrim hian kan khawvel a ti muang a ni.

Kan CM leh a thiannu thusawite kha an va han tha tehreng em ! Programme set hi kan committee-ah kan sawi reiin kan sawi tam bawk a, a fuh em em hlawm a. Hun pawh kan hmang dik a ni.  A hnua kan khuallian te nena kan han thlir let leh pawhin tha an ti a, an hlim a.  Tunhma zawng aiin Bangalore Mizote min hmuhdan a let tam takin ‘good, better, best’ niin ka hmu.  Hei hi ka programme azara kan hlep lian tak chu a ni.  Midang thlirtu ni ta ila PERFECT SCORE ka pek hial tur chi  a ni.

LAWMNA TI KIMTUTE

Ka lawmna ti zualtu deuh deuhte tarlan ka duh em em a awm a, ka thusawinaah ka lo telh kim lohte an ni a.  Kan function a han zawh meuh kha chuan lawmnain ka khat a, saptawng takin ka ‘emotional’ phah hial mai.

• A hmasa berin kan memberte min tawiawmna te, ruahmanna tih hlawhtling tura rim taka thawktu zawng zawngte bakah ka committee-a ka thawhpuite ka fak a, SALUTE ka pe duh a ni.
• Tin, hun engemaw ti deuh lai atang khan UTC family te hian BMA hi min en dan a dangta deuhva hriatna kan nei a, kan vui ru deuh a ni.  Tunhma an ang lo kan ti hman lek lek a.  Tun tumah hian namen lova an tawiawmna (an chhungkuain) kan chan hian nasa takin min ti lawm thar a. Tunhma deuhva UTC zirlai mimal leh family te, kan rinrawl leh min uap fel tute an nih thin ang chiah kha a lo lang thar leh a.  Hei hi thil lawmawm a ni.  Bangalore Mizote khawtlang nuna chanvo pawimawh an lo chan thin avanga Bangalore Mizote tuammawitu an nihzia hi sawisen a ni lo asin.
• A dawt lehah chuan he Silver Jubilee lawmna hi a hraw a, sum pawh kan mamawh tam a, a ti hupphurhawmtu lian ber a ni reng a.  Mahse, Pi Ann Lalrinawmi IRS tanpuina duhawm tak dawn te, kan memberte hnen atang tanpuina donation kan dawnte avang chauhvin hetianga hlawhtling thei hi kan ni.  Family 45 atangin tanpuina a lo lut a, hnathawk  mi 67 atangin kan hmu bawk a, tin, sum lama neinung biklo, zirlai 197 atangin tanpuina kan dawn bakah Bangalore khawpawn mi 11 hnen atangin kan dawng bawk a ni.  Tin, hnamdang, Mysore, Bangalore leh hmundang amiten sum tam tak thawhchhuahpui a sponsorship min  tihsakte hi kan thil Silver Jubilee lawmna programme pum ti hlawhtlingtute chu an ni.
• Essay inziahsiakna leh Hlaphuah siakna lawmman sum rawn thawhtu, Pu Shiv Shankar leh Pi Vanlalsiami te chhung leh Rev. Dr. K. Sapthanga te chhungkuain kan programme a ti hausa mai ni lovin Bangalore Mizote hmel ti tha tute an ni.
• Kan hall pangpar mawi taka min cheisaktu Pu Khawmawia ( Bangalore veteran ti ngat teh ang) leh a thiannu Pi Rose-i te contribution hi a hlu ngawt mai. An insengso hle ang.
• Banner buatsaih a a design concept duangtu Tv. Madawnga a fakawm bawk.
• ARKAIDEN ZAN banner mawlh hi ‘world class’ tih ngam a ni.  Han enchian poh leh a fuhzia sawithiam bak a ni.  A designtu- Abel Gaikwad ( Bangalore-a seilian tih ngam ) hian talent a nei ropui  a ni. A future a bright ngawt mai.
• Kan Jubilee hla min siamsaktute- Aries Vanneihtluanga leh Lalmuansangi Hnamte te hi BMA-in inhming kan immortalise kan ba bawk.  Tin, zaipawlte khan in thiam lutuk.  Kei ka lo ngaithla fuh emaw ni tihdanglamin ka awm fo mai.
• Kan senior, kan nu leh pate leh ute tawiawmna kha a tha thlawt bawk a, anni an thut khap chuan kan programme an ti zahawm thin reng a ni.
• Chhinlung Magazine buatsaihtute, Editorial Board thawhrimna a ropui, magazine tha dangdai tak kan dawng thuai dawn  a ni.
• Kan programme booklet-a uluk taka kan duan anga buatsaihna sum thawhtu Lydia Malsawmtluangi te, Rebecca Muanpuii Fanai te, Emily Lalnunpuii leh Robert VL Fanai te chungah kan lawm.
• Tin, refreshment senso a tam dawn min hriatpui a, a hranpaa tanpuina petu  an awm a, an pek khawm hi Rs. 10,000 lai a ni bawk.  A hrana donation pe tawhtute an ni zui. An va hlu em!

ARKAIDEN ZAN

Ka tihtawp hmain Arkaiden Zan programme kha a host tute khan min ti phurin min ti hlim a, an chanvo an tlin hle mai. Tin, a programme (saptawng telh mai ang ) content leh variety a fuh tha em em a,  hun hmang hek silova item tha tak present dan an thiam bawk.  Bangalore Mizote hian hma kan va han sawn em! tih hi ngaihtuahna a lo luang lut chu a ni. Mipui lokal khawmte kan discipline a tha a, kan security service kha a ropui ru riau bawk a, ‘sawi kher ngailo’, kaihhruaina min pek dan te kha a zahawm a ni.

A tawp berah chuan, Silver Jubilee lawmna programme inthuah leh hautak zet mai enkawl theimi mi tling BMA OB leh Executive Committee kan nei hi a fuh em em a.  A bik takin, kan President te pahnih, Pi Lalrinpuii leh Pu Josiah L. Ralte te inpekna avangin kan hlawhtling a, anni pahnih leadership thatzia hi a lang chiang em em a ni.

Bangalore Mizote hi tunhma atang renga zoram dung leh vang leh ram danga miten zah leh chung ena an lo en thin (respect ti kher teh ang) kan ni.  Thil tam takah thil tha danglam bik ching chhuaktu leh ram thatna tura kaihruaitu kan lo nih thinna chu kan la vawng him zel niin a hmuh theih a, chu chu vawng nung zel ang u. Muansangi hla chang khat hi rilruah a lo lang tlat mai.

I nghilh lawng aw, Zofaleng zawng te’n, Lungrualna, thiamna hringchhuaktu,

Vul zel ang che, BMA,   Engmawi, rimtui chhuah zel ang che.