Education in Bangalore

Bangalore hi mitam takin "Sience City" tih te, "Cyber City" tih te a an hriat lar a ni a. Zirlai tamtak India ram leh ram dang atangin an rawn fuan khawm thin a. Zirna in hrang hrang te chuan zirlaite nakin hnu a hna tha leh inelna sang tak tak kar a thawk thei turin subject hrang hrangah zirna an pe a.

Heng Bangalore a zirna sang lar zual deuh te phei chu international level ah pawh an an chhuanawm hle a ni: Indian Institute of Science (IISc), Indian Institute of Astrophysics (IIA), Indian Institute of Management (IIM-B), Centre for Liquid Crystal Research, National Aerospace Laboratories, Indian Space Research Organization (ISRO), etc.

Primary leh Secondary level a zirna te hi sawrkar emaw private enkawl an ni deuh ber a. Bangalore a private school te hian a tlangpuuiin English in an zirtir a. Tin, ISCE, CBSE emawh Karnataka board a in ziak lut an ni tlangpui bawk. College zirlai tan zirna peng hrang hrang ah professional course (engineering, medical, management, etc) emaw course tlanglawn deuh (Sciences, Arts, Commerce) lamah te zirna hmun tam tham tak a awm bawk a ni.

Mizo zirlai Bangalore a zir (tum) tana hriattur tul te

Admission i lak hma in ahnuai a mite hi institute brochure, Internet leh a kal tawhte atangin chian hmasa phawt rawh:

• Zirna tur institution chu sawrkar/industry recognize a ni em

• Zir tum course chu sawrkar/industry recognize a ni em

• Zir hun chhung enge

• Zirna a senso tul

• Hostel/Accomodation remchang a awm em

BMA Member-Te, Zirlai Nu Leh Pate, Khualzinte etc Tana Hriattur Pawimawh:

BMA Executive Committee chuan, BMA member-te, a bik takin zirlaite leh zirna zawnga lokal te, Bangalore-a lo zin te, a hnuaia thupawimawhte hi ngun taka chhiar a, zawm a, tihlawhtling turin a beisei a ni.

Zirlai Te Tan

• a) Admission Chungchang:
  Zirlai admission zawng apiangte mahni inbuaipui thei tura beisei an ni. Loh theih loh thila midang kan tibuai a nih chuan admission buaipuitute ei leh in, veivahna senso te, form leh thildang man te kan tumsak ngei tur a ni.
   

• b) Hostel/School/College/Institution dan chungchang:
  Zirlaite’n kan awmna Hostel/School/College/Institution dan leh inkaihhruaina te ngun taka zir a, hriat a awm ngei tur a ni. Harsatna chungchangah te,chhuahvah chungchangah te thuneitute hriattir a, an phalna leh an thurawn ngaihchan hmasak a tha hle.
   

• c) Guardianship chungchang:

1. Zirlai Hostel-a awm leh awm lo te pawhin Guardian neih a tul thin a, Guardian-a kan hman tur te remtihna lak hmasak a inbiakfel hmasak ni thin se a tha hle ang.

2. Guardian te leh Hostel Warden-te remtihna la hmasa lovin tumah riah chhuah tur a ni lo. Rokhawlhna thilah mahni guardiante in ni lovah riahchhuah a tul chuan mahni guardiante hriattir hmasak thin tur a ni.

3. Hostel-a awm ten chawlh hlek apianga riah chhuah leh in hruaichhuah beisei lo se, guardiante tibuai lutuk lo zawnga awm thiam a tha. Dam loh thilah pawh enkawl tute leh buaipuitute senso tumsak thei se la a duhawm.

4. Zirlaite chawlh lai emaw thildang vanga guardian-te hnena
an khawsakin mahni duh thu thu a awm lovin, guardian/thlenin te mitmei ven thiam ni se a tha hle ang. [Entirnan: zuk leh hmuam, len khaw tlai, electric bungraw hman, telephone, tape player, computer etc hman leh khawih ilo vel chungchangah te].

5. Zirlaite guardian-te hnena kan riahchhuahin, chhungkaw khawsakna leh nunphung hrang hrang chungkaw programme privacy, naupang zirna, ei leh in etc. kan tibuaiin kan tih hautak belh a ni tih hriain, mahni intodelh kan tum tur a ni. Chutianga guardian-te ina kan riakchhuak a nih chuan, nitin/zankhat atan Rs. 100/- hi in man atan kan thawh ve tur a ni. Tin, kan guardiante institution-a awm an nih chuan, institution-in mikhual ‘fee’ a lak te kan pe tel bawk tur a ni.

6. Single students inluah leh Hostel a awmte hi zirlai ve bawk an avangin guardian-ah hman loh ni se. [School/College engemaw zat khat chuan naupang deuh guardian-a hman an pawm lo].
 

• d) Zirlai inluah a awm te chungchang:
  1. Zirlai mahni emaw thiante nen emaw PG-a awm emaw te kan khawsak danah fimkhur takin awm tum ila, midang thenawmte nin khawpin emaw hriatthiam loh zawngin kan awm tur a ni lo va. Mi ramah hnam dang kara awm kan nih i hre reng fo ang u.
  2. Zirlai inluah a awm te hi riah chilh, thlenchilh loh a tha ber. Harsatna tam tak, zirna-ah te, mess-ah te, institute-ah te i thlen sak a ni tih hriat a tha hle.
   

• e) Nunphung leh Incheina Chungchang:

1. Zirlaiten Bangalore-a kan awm chhan hrerengin, kan zirlai kan ngaihpawimawh hmasaber tur a ni. “A zirlai aia thildang ngaipawimawh mi chu a inchhir thin”.

2. Hnamdang kawm leh biak chungchangah ’Polite’ takin chet tum ila, mahni leh kan hnam timualpho thei zawng a chet loh i tum ang u.

3. Zirlai tibahlah thei chi Club, Party, Pub/Bar, chat etc. ah te insum a tha. Hetiang lamah hian Zirlaite hmel a lang tam leh tan niin a lang a, i fimkhur ang u. Chatting-te pawh awm tawk neih a tul, darkar tam tak khawhral hi changkanna ani lo tih hriat a tha hle.

4. Incheina chungchangah zirlai te incheina awm tawkin i inchei ang u. Tun hnaiah Mizo zirlaiten incheina uchuak deuh avangin admission chung changah harsatna kan tawk a, i fimkhur ang u. “Ka incheina chu ka thu a ni” tih ngaihdan a awm thin. Chutihlaiin kan inchei danin midang tan harsatna a siam a nih chuan “Hnam pawikhawihna” a ni tih i hrereng ang u. India ramah ’culture’ leh ’tradition’ ngaih pawimawhnaah kan cheng a, chu mai bakah ’Mizo’ kan la ni bawk. Hmeichhia te incheina hian ’hnamzia’ a keng tel bik a ni tih hriain, mahni hnamzia hum him zawngin inchei i tum hram hram ang u.

5. Hostel-a awm ten hostel warden phalna la hmasa lovin mikhual thlen loh tur a ni. Kan unau ngeite pawh nisela, Mipa leh Hmeichhia inthlen pawlh loh tur a ni.

6. Mizo hminga thil tihhona-a kan telna tur chi ah chuan tel ve zel tum ila. Tlawmngaih a hunah tlawmngaihna dik a tlawmngaiin Mizo nun i chawi kang zel ang u.

Zirlai Nu Leh Pa leh khualzinte tan:

i. Zirlai nu leh pa ten kan fate kan ngaihsak tha hle in a lang a, a lawmawm hle. An nungchang a chhia leh a tha zawng zawngte dawng thei tura inhawn a tha khawp mai. Kan fate tan Guardian kan ruat a nih chuan discipline chungchangah te, pocket money leh thildang dangah guardian-te kut a kan dah chin thliar fel a tha khawp mai.
ii. Chhung leh khat, thian thate, tu leh fate kan induhsak a, thil lawmawmtak a ni. Mahse, mi tlawmngai turin kan beisei a thil fun te tak te thawn kan tum a ni thei mahse a kengtu tan chuan bag dang ken belh hial a ngaih phah fova, thlawhtheihna-ah te, rel-ah te bungraw ‘excess fee’ tam tham tak chawi a ngai fo mai a. Hei hi thil tha lo tak a ni. Dak-ah te, courier-ah te thil thawnna tha tak tak a awm a, heng hi hman tangkai thiam ni se. Mimal zin veivak te, zirlai etc te thil thawn te hi a chin tawk hriat a hun ta hle. Midang tlawmngai tura beisei lovin, mahni tlawmngaiin midang harsatna siam i pumpelh ang u.
iii. Bangalore a zin tur reng reng te’n, chamchhunga sum leh pai mamawh zat tur chhut lawk a kan tlin leh tlin lohte ngaihtuah lawk a tha khawp mai. Mahni intodelh a tha a loh theih loh thilah chhungkuaah thlen kan tum a nih chuan a hmaa inbiak lawk a tha. Bangalore thlen hnua thlenin zawn chawp a, rei tak tak inthlen chilh hi chin loh tur a ni. Mimal kan thleng a nih chuan, zankhat/nikhat-ah Rs. 100/- tal ’mess fee’ pek ve thin tur a ni. Institution in thlenman a siam chuan chu pawh chu pek tur a ni.

Khing a chunga inkhaihruaina te khi, hlim tlang tak leh harsatna te tawk lova, Mizo nun mawi taka kan chawi nun zel theih nan a buatsaih a ni e. Mi tute pawh, Bangalore-a awm chhunga harsatna in tawk a nih chuan BMA hi nangmahni tanpui turin a inpeihreng a ni.

College Admission atana thil tulte:

• i. Original Marks Sheet (HSLC and above).

• ii. Migration, Transfer and Provisional Certificates.

• iii. Passed Certificate from the School or Institution last attended.

• iv. Eligibility Certificate to be applied and obtained from Bangalore University Administration Building, near Central College.

• v. Passport size photographs (5 copies).

• vi. Caste Certificate.

Thurawn Pawimawh:

• i. Englai pawhin kalna apiangah Identity Card emaw, Driving licence emaw keng zel ang che.

• ii. Pocket Note bu te takte nei la, tah chuan telephone number pawimawh zual leh i chhungte/local guardian te address leh phone ziak la, emergency atan i Blood Group ziak bawk ang che.

• iii. Auto Rickshaw-a i chuanin, i chuanna Auto number/Identity number chhinchhiah ziah thin la, thil theihnghilh i neih palh pawhin chhui a awlsam ang.