“Chawngkhum dân tlâng huat loh”!!! Zan tam tak chu Zoram lama ka thiante ka biak châng apianga min chhânna chu “Comedian Search kan en a, kan hlimpui lutuk” tih emaw “Comedian Search kan en a, zanin chu kan inkhawm lo mai” tih a ni tlangpui. Fiamthu hian min tihhlim mai bâkah, mihring nuna thil pawimawh tak a ni. Ram pawna kum sawm chuang kan awm bo ve tak hnua ka thilhriatchhuah thar pakhat chu Zofaten fiamthu kan lâwm a, kan ngaihhlut ang tluk hian hnam dang ho hian an uar ve em em lo. Mizo awmkhawmna tawh ah chuan han nuih huah huah te, han infiam bawrh bawrh te hi thil awm ve ngei ngei a ni tlangpui. Zoram cable operator changtlung takin hetiang rilru pu a intihsiakna an buatsaih hi an fakawm khawp mai.

Keima rilru phak tawk tein kan ngaihtuah chet chet a, Zoram, Kristian ram kan tihah hian, intihhlimna leh khawvel thil tam tak kan ngaihhlut ang hian sakhuana leh hmasawnna dangte hi ngaihhlut nachang hria ila kan chhungkua, khawtlang leh ram hian hma a va sawn nasa dawn êm! Mahni hmazawna mawhphurhna kan neih theuhte hi rilru leh tihtak zet a kan hlen theih chuan changkanna kawnga rahbi pawimawh tak kan rap a lo ni. Zirlai chuan a mawhphurhna a hriat a, TV, mobile, internet leh thil hlimhlawp ringawt a a rilru a pek loh chuan mihlawhtling tak a ni ngei ang. Chutiang bawkin nu leh pa, zirtirtu, sawrkar hnathawk, sakhaw rawngbawltu leh hnathawh hrang hrang nei ten kan ko a innghat theuhte kan hlen chuan kan thawh hlawk hlawm tlang hle ang.

Fiamthu inthawhsiakna (Comedian Search) kan neih ang hian, “Inkhawm peih Search”, “Pathian thu awih Search”, “Lehkha zirpeih Search”, “Mitlawmngai Search”, “Mifel Search”, “Kristian thalai tha leh inpe Search” te hi han nei dawn ta ila, thlan tur kan awm tam viau ang em? Anih loh pawhin “Mi awm tha duh lo Search”, “Sakhaw ngaihsaklo Search”, “Pathian Biakbuk thleng ngailo Search”, “Mahni hmasial Search”, “Kohhran hruaitu te rel ching Search” emaw te han nei dawn chiah ila, hetiang a tel ve tlak hi kan tam viau ang em? Kohhran pum ang emaw Kohhran Thalai Pawl ang emaw Kohhran Hmeichhe Pawl ang emaw ten hetiang “Search” hi kan neih fo a, mithâ te chawimawina châng leh dawmkan, zilh, fuih leh puih ngâite kan tanpui fo chuan khawtlang leh kohhran tan kan va thawhhlawk dawn êm! Midangte sawisel a, ho lam taka “Search” nei satliah mai lovin leh chumi khami chu inkhawm a ngaihsak lo ti ringawt lo hian an mahni In ngeiah tlawhchhuah tum ila, enge harsatna a neihte zawhfiah a, tanpui a ngaihna laiah te pui thei tura kan inhuam tlat chuan midang tan malsawmna kan va ni dawn êm!

Kristian tha chuan a nunah a lantir thin. Kohhran mi ka ni inti ve si a, inkhawm leh sakhaw ngaihsak miah lo, chhiatni thatni chauha kohhran bel mi ka nih chuan ka nunah “Search” tur ka la ngah hle tih a hriat a. Khua a tlai hma a, mahni nun inenletna leh insiamthatna kan neih hi kan la inchhir lohna tur pakhat a ni. Kan nitin nunah “Isua Search” neiin Ani chu kan nun kaihruaitu, kan model lo ni deuh deuh rawh se.

Robert Faustin (Bâttê-a)
Shillong