Kumtina kan lo hman chhoh thin Kutpui nuam tak ‘Vangpui Kut’ chu kumin hian hman leh tura ruahman a ni. Kumdangah pawh nuam tak leh hlim takin kan lo hmang tawh thin a, kumin pawh hian chuti ang aia nuam leh hlima hman tum a ni.

Vangpui Kut chu October ni 6 (Ningani) leh ni 15 (Inrinni) ah hman tura ruahman a ni a, a buaipuitu sub-committee te an tang nasa tan hle ani. 6^th October hi Ningani a niin chawlh a ni a, 15^th October ah hian Kut Ni hman tum a ni. Hengte hi kan infiamna tura ruahman chin te an ni e – Volleyball, Basketball, Tug of War, Balloon Shot-put, Football Passing, Lawngkar, Arm Wrestling, Insuknawr, TT/Badminton, Water Race, Inkhawibah, Opposite Shotput, Slow Motion Race, etc. Vangpui Kut kan hmanna tur atana items chi hrang hrang ruahman lawk te ilo thlir teh ang –

Cultural Items:

1. 1.                  Essay Writing

Thupui: ‘Mizote leh Thianghlimna’. Thehluh hun hnuhnung atan October ni 9, 2011 a ni.

1. 2.                  Solo

Mipa: A teuh lo mai (Sanglura hla)

Hmeichhia: Aw Zoram nuam suihlung phang lo la (Daduhi hla)

3.         Hla phuah: Sual dona lampang hla

Essay leh hla phuah a pakhatna te hi Chhinglung Magazine-ah dah telve an ni ang a.          Tin, Chheih lam intihsiak hlimawm tak mai kha a awm leh anga. Kan la neih ngailoh Comedian Search pawh Section tin atangin pahnih theuh neih theih tura ruahman a ni. Heng bakah hian chanchin chiang zawk chu remchang veleh kan rawn tarlang dawn nia.

HVLT Mawia hriatreng nana BMA in kum 2005 atanga kumtin Football League/Tournament kan lo khelh thin chu kumin 2011 pawh hian BMA Committee chuan khelh leh turin a lo ruahman leh ta a. A chipchiara tarlan rem vek lo mahse, hemi chungchanga hriattur pawimawh thenkhat  i lo tar lang teh ang.

1. Inkhelhna hmun tur Nandan Football Ground, Austin Town a ni.
2. Inkhel turte chu BMA member dik tak an ni tur a ni.
3. Last Date of Team Registration – 5^th. Aug. 2011. ( Hetah hian Players te hming details a ngai kher rih lo. Team tel tur zat leh Team hming hriat hma a ngaih vang a ni)
4. Last date of BMA Member Registration – August 10. 2011 ( Hemi ni aia tlaia member in register te khelh phal a ni dawn lo.)
5. Team tel turte chuan an Team Details – Team Hming, Jersey Colour, Players te hming leh an Passport size photo an thehlut vek tur a ni. (Team registration ti hmasa apiang Jersey colour thlan chung changah dah pawimawh an ni ang). BMA Sports Incharge Tv. Michael Rualzakhuma hnenah Rs 500/- nen August 10^th. 2011 ral hma ngeiin theh luh tur a ni. Football Sub-Committeein ngun takin Registration hi a endik ang.
6. Team tinin mahni Ball an nei \heuh tur a ni. Jersey erawh tih luihna ni lovin neih hram tum \heuh nise.
7. Inkhel a rualtlan zawk theih nan kumin hian Category A le B ah \hen tum a ni a, amaherawhchu Team in register a zirin Committee in a ennawn anga, a \ul a tih dan a zirin a ti danglam thei ang.
8. Category A ah Team list Manager-te tiamin 18 thleng ziah phal a ni.
9. Category B ah Team list Manager-te tiamin 21 thleng ziah phal a ni.
10. Substitution siam theih zat – Category B ah mi 6 leh Category A ah mi 3 a ni ang.
11. Chi bing leh hnambil ang chi a Team/Club din leh tel phal a ni lo.
12. Inkhelh hun atan 13^th .Aug leh 15^th. August ruat a ni a, khelh dan tur (match duration/league/knock out/ category) te chu Team chhuak a zira la tihfel a ni ang.
13. Ni 2 chhunga zawh fel tum a nih avangin Team tinte khelh hun tur ruat felin, hun a dik thei ang bera hman leh dan kan siam a theih ang chen chena kenkawh tum a ni.
14. Inkhelh hun tur ruatah Turn-up lo chu minute 15 nghah an ni ang a, hemi hnuah hian mi 7 an tlin chuan khelhtir phal an ni ang. Minute 15 hnua hemi hi an tling theilo anih chuan Work over an ni ang. (He dan hi khauh taka ken tlang tum a ni)

Khelh hun tur Timing siam vek ni mahse, Work over an awm chuan a dawt leh chiaha khel turte koh nghal an ni ang a, Minute 15 chhung bawk pek an ni ang a, Turn up theilo apiang chu a chunga dan ang hian Work Over ve nghal theih an ni ang.

Bangalore Mizo tena kan lo nghah hlelh em em Mizoram House chu nimin 20th April 2011 khan khual lian Pu Lal Thanzara, Parliamentary Secretary to Chief Minister in a hawng a, Minister Pu Lalrinliana’n a rawn tawi awm bawk a ni.

House hawnna hunserh hi tlai dar 5:30 ah tan niin thusawi leh zai program te neih a hun hman a ni a, hunserh zawh hian chawhlui kilho nghal a ni. Mizoram House ah hian Dormetry Pahnih a awm a(mipa leh hmeichhia), tin VIP room Pathum a awm bawk a ni. Thlen man hi state danga house rate ang tho a ni bawk.

Hawnna hunah hian Bangalore mizo thalai, nu leh pa an kal tha hle a, program kaihruaitu hi Pu Talo Rosanga, Senior Liaison Officer, Kolkatta niin, Pu Lal Thanzara leh Pu Lalrinliana te hnen atangin thusawi ngaihthlak a ni a, zaithiam Marlyn Lalmalsawmi, Eliza Vanlalpeka leh Saitluangpuia Sailo ten zaiin kalkhawmte min awi a, tin BMA President Rev H. Lalthlamuana leh Ex-President Rev C. Vanlaldika te hnen atangin thusawi ngaihthlak a ni bawk. Tin, Bangalore Mizo Christain Fellowship (BMCF) lam atang pawhin President Rev C. Lalmuankima’n thu a sawi bawk a ni. Heng thusawi zawh hnu hian House hlanna leh Malsawmna tawngtaina BMCF Vice President Rev Dr. K Sapthanga chuan a nei a, chawhlui kilhona in a chhunzawm nghal a ni.

Bangalore-a Mizoram House chu April ni 20 (Nilaini) hian hawn a ni dawn ta.  Mizoram sawrkarin Bangalore khawpuia Mizo mipuite tana innghahna tur Inpui tha tak mai, damlohna avangte, zirna leh hnathawhna avangte a Mizotena kan chhawr em em tur an rawn dah hi Bangalore Mizo te chuan lawmawm kan ti hle ani.

Inrinni (April ni 16) khan Senior LO, Pu Talo Rosanga pawh he Mizoram House hawn dan tur chungchanga thil tih fel ngai leh hmalak ngai te buaipui turin Kolkata atangin a rawn chhuk a. Tin, Mizoram sawrkar in Bangalore Mizo Association te chu he hun atana ruahmana te lo siama, a tul apiang lo buaipui tura a ngen angin nimin Inrinni (April ni 16) vek khan Pu Talo Rosanga hoin meeting chu Mizoram House turah hian an nei nghal bawk ani.

Nilaini tlai lam dar 5pm ah Mizoram House Hawnna Inkhawm hi neih a ni anga. Inkhawm chu Pu Talo Rosanga, Senior Liaison Officer, Kolkata in a kaihruai anga, Chief Guest tur chu Pu Lalthanzara, Hon’ble Parliamentary Secretary to Chief Minister, Government of Mizoram a ni ang. Tin, Pu Lalrinliana Sailo, Minister i/c Health, etc. pawh he hun hmang tur hian a lo kal dawn bawk a ni. He hawnna inkhawmah hian report te leh thusawi tawi te te ngaihthlak a ni anga, tin zai mawi tak tak te pawh ngaihthlak tur a awm dawn a ni. House lawmna ruai chu zan dar 8pm ah theh tura ruahman a ni bawk.

Bangalore Mizoram House ah hian bed room panga (5) a awm a, Hall pahnih awmin kitchen leh dinning hall nuam tak a awm bawk a ni. Ground floor lamah chuan Mipa awmna tur dormitoty siam a ni a, 1st floor ah Hmeichhe awmna tur dormitory siam a ni bawk a ni. A In a lianin room te pawh a lian tha hle a, thlen pawh nuam tak tur a ni.

Mizoram House Chanchin tlem…

Mizoram mipuiten Bangalore khawpui kan mamawhna, damlohna thilah te, hna tha zawk thawhna thilah te leh zirna lamah te, a lo lian ta hle mai a. Tunah chuan Mizo mipuite tana thlamuang taka chawlhna leh innghahna tur In kan nei dawn ta ani. Kum 2008-2009 atanga tun hun thlenga Bangalore Mizo Association hruaitutena kan ram roreltute hnena an lo ngen thar lehna leh an lo beisei thar zelna chu tunah chuan a tak hmuh tur a awm dawn ta a ni. Mizoram roreltute chungah Bangalore Mizote kan lawm hle a ni.

Ningani (9^th December 2010) khan Mizoram sawrkar aiawhin Pu Talo Rosanga, Senior L.O., Kolkata Mizoram House chu Bangalore-ah a lo kal a. Zingah Airport-ah lo thlengin kan President Rev. C. Vanlaldika hoin, Rev. B. Zohmangaiha leh Rev. J. Lalduhawma te’n an lo hmuak a. Hemi ni vek chhun dar 2 ah In neitu Pu Kishore te nen chuan Inluah inremsiamna chu, a man te leh peklawk ngaite in pe felin an ziak fel ta a ni. Hemi ni vek hian Mizoram House tur pawh Pu Talo Rosanga hoin en a ni a, chahbi pawh in hlan fel nghal a ni bawk. In neitute nena tihfel ngai zualpui chu hemi ni hian tihfel nghal a ni. Senior L.O. Pu Talo Rosanga chu zan riaka a tuk Zirtawpni chawhnu lama haw turin ruahmanna siam a ni a, kan senior member Dr. Lalrinawmi Ralte in a mikhual a, a tuk Zirtawpni chawhnu dar 3 chuan Kolkata lam panin min hawsan ta a ni. A hun hlu tak seng a House tur chungchang thil tam tak a rawn tifel hi Pu Talo Rosanga chungah Bangalore Mizoten lawmthu kan sawi bawk e.

Tuna Mizoram House tur hi luah (rent) mai a la ni a, inremsiamna pawh kum 3 chhung atan chauh siam lailawk a ni. Bangalore khawpui hi kawng hrang hrangah Mizoten kan mamawhna a nasa hle tawh mai a, a hmun nghet neih hma a hetianga thil tha tak mai kan ram sawrkar hruaituten Zoram mipui tana an ruahman hi a tha hle mai. A hmun nghet zawk kan neih thuai theih nan Bangalore Mizo khawtlang mipuite pawh tang tlang zel turin kan in ngen e.

Mizoram House hi thla khatah Rs. 80,000/- (Sing riat) a luah a ni a. A enkawltu turte pawh Mizoram sawrkar chuan a rawn tifel thuai ang tih kan beisei a. A In hi chhawng khat niin room lian tak tak 5 lai a awm a. A awmna hi Bangalore chhim chhak lam niin, National Games Village atanga 80 feet Peripheral Road a tlan phei zelin veilama pen luh a ni a.

Mizoram House hi a hmun nghet tura state sawrkar te pawh inbe zel an ni a. Kan Chief Minister zahawm tak Pu Lal Thanhawla ngei pawhin BMA in Silver Jubilee kan lawm tum (October 2009) khan Karnataka state roreltu te a hmu tawh nghe nghe a. He In, a hmun nghet kan neih hmaa a luah tala Mizote mamawh House kan ram roreltuten min ruahman sak hi Zoram mipuite mai bakah helai hmuna awm Mizote tan hian a tangkai dawn hle a, a lawmawm hle a ni. A hmun nghet tur hi kan nei thuai turah pawh ngai ila, helai Mizo khawtlang pawhin hemi atan hian theihpatawp i chhuah zel ang u.

Mizoram House address leh Phone number:

#311, 6th Main, 6th Cross, S.P. Bed Layout, Koramangala, Bangalore-34.

Reception: 080-2550 4815

Pu Ajay Kumar, LO: 080-2550 4823

Fax: 080-2550 4830

Bangalore Mizote Atangin Lehkhabu Thar

ZORAM THAR A AWM THEI ANG EM?

Bangalore Mizo Association buatsaih lehkhabu “Zoram Thar A Awm Thei Ang Em?”tih chu February 27, 2011 khan J.R.C. Hall, United Theological College, Bangalore-ah tlangzarh a ni ta. He lehkhabuah hian article 24, mi hrang hrang ziakte a chuang a. Zoramin hmel thar pua hmasawnna kawng a zawh zelna kawnga lehkhabu tangkai tak ni tura ngaihah hian tunlai huna kan ramin harsatna a tawh hrang hrang chik taka zirna leh chumi laka kan himna tur thu tha tak tak a chuang ani. Zoramin hmel thar a put theih nana Bible zirtirna pawimawhzia te, hnam nun ze tha leh rorelna dik hlutzia te, chhungkaw tha leh inenkawlna awmze nei leh hnam hmasawnna tur thu tangkai tak tak a chuang. He lehkhabu phek 366 zeta chhah, a kawm chhah nalh taka  tuam hi Rs. 200/- man chauh a ni ang.

Bangalore Mizo Association hi kum 1994-a din a ni a, Thu leh hla hmanga Mizote hmasawnna tur ngaihtuahin CHINLUNG MAGAZINE pawh vawi 15 a chhuah tawh a. Chuta chuang thu leh hlate chu Zoram thar dinna kawnga mite nun kai harhtu pawimawh tak a ni hlawm a, THU THLUR BING huanga thu ziak leh sawihote chu mite an hlut hle thin a ni.

Abstract

Zoram Thar a awm thei Ang Em? tih hi khawtlang nun siamthatna lam hawi lehkhabu a ni a, kan ramin hmel thar pua hmasawnna kawng dik a zawh zel theihna tur thu tha leh tangkai chi hrang hrang 24 zet chuanna bu a ni. A ziaktu tam ber hi doctoral research bei mek leh zo tawh te leh mahni kalna zawna thiamna bik neite an ni fur a, a tam ber hi Pathian thu zirna leh College/University lama zirtir hna thawk leh zir mek te, sawrkar leh company liana hna pawimawh tak chelh te an ni hlawm. Chu vang chuan an thu leh hla hian chhiar ngei a phu a, belhchian pawh a dawl ngei ang. Khawtlang nun siamthatna atana Bible leh theology, zirna, hnam nun ze tha, chhungkaw inenkawlna tha, sex education pawimawhna leh thil dang pawimawhzia kawngkal fel tak leh fiah taka ziakna a ni ber. Bangalore Mizo Association buatsaih he lehkhabuah hian tun hma lama Zofaten kan hmuh phak loh zirtirna tha leh thu thar engemaw zat chuang khiau maite hi  a vângin a ngaihnawm hle.

Zoram thar nghah thu leh khawtlang nun siamthat lam chuanna bu hi kan lo hmu tawh thin a, tuna lehkhabu thar lo chhuak leh ta hi Mizoram pawn atanga chhuah a nih avangin a lehkhabu pianhmang mai ni lovin an thu sukthlek dan pawh kawng tam taka danglamna a awm.

A bu chhung thu thenkhat te chu…

• “He theology hi chuan Pathian Ram dikna leh felna a hmachhuan ang a, mi lian leh hausate thianah siamin a tlawn lo vang, mi sual thiltitheite a zuah hek lo vang a, mi retheite dikna a palzut ngai lo vang.” (p. 26)
• “Mi pakhatin In Hmun Pass sawm chuang chuang a neih laia vakvai eng emaw zat lo awm si hi a thlarau lo em em a; dikna (justice) kan tih nen phei khi chuan a inkalh hulhual a ni.” (p. 42)
• “Isuan Galili thingtlang mite a hmangaihin rawng a bawlsak a ni. An zingah a cheng a, aikal a ruai ve lo!” (p. 71)
• “Globalized leh Postmodern khawvelah Zoram thar kan ti maw?” (p. 73)
• “Senority list-a chuang pha chin, Principal leh Headmaster nih inbeisei pha chin pawh nise, sikul tan an tha dawn em tih finfiahna tur Exam engemaw tal paltlang ngai awm se …” (p. 91)
• “Necktie leh kawrchung te hi sakhaw thil nge culture?” (p. 167).
• “Vai te, Sap te, Japanese ten an neih ve loh thil tha tak tak kan neih hi hmusita hnualsuat mai loin i uar sauh sauh ang teh ang u.” (p. 192).
• “Lal Isuan Kohhran pakhat a din a, keinin phel hransain kan dawng si a…” (p. 236)
• “Zoramthanga lar laia, ‘khaw nge in awm a,’ an tia zawhna tawn changte Mizoram mi kan ni tih an hriata, “Jouramtangga’ an tih ve thin khan Mizo nih a tinuam …” (p. 267).
• “Naupangte hian hmangaihna hi hi ‘H-U-N’ tiin an sipel tlat nia!”(p. 308).
• “I fanu-fapa khan ‘You make me want to be a better man/woman’ a ti thei asin!” (p. 329).