Bangalore Mizo tena kan lo nghah hlelh em em Mizoram House chu nimin 20th April 2011 khan khual lian Pu Lal Thanzara, Parliamentary Secretary to Chief Minister in a hawng a, Minister Pu Lalrinliana’n a rawn tawi awm bawk a ni.

House hawnna hunserh hi tlai dar 5:30 ah tan niin thusawi leh zai program te neih a hun hman a ni a, hunserh zawh hian chawhlui kilho nghal a ni. Mizoram House ah hian Dormetry Pahnih a awm a(mipa leh hmeichhia), tin VIP room Pathum a awm bawk a ni. Thlen man hi state danga house rate ang tho a ni bawk.

Hawnna hunah hian Bangalore mizo thalai, nu leh pa an kal tha hle a, program kaihruaitu hi Pu Talo Rosanga, Senior Liaison Officer, Kolkatta niin, Pu Lal Thanzara leh Pu Lalrinliana te hnen atangin thusawi ngaihthlak a ni a, zaithiam Marlyn Lalmalsawmi, Eliza Vanlalpeka leh Saitluangpuia Sailo ten zaiin kalkhawmte min awi a, tin BMA President Rev H. Lalthlamuana leh Ex-President Rev C. Vanlaldika te hnen atangin thusawi ngaihthlak a ni bawk. Tin, Bangalore Mizo Christain Fellowship (BMCF) lam atang pawhin President Rev C. Lalmuankima’n thu a sawi bawk a ni. Heng thusawi zawh hnu hian House hlanna leh Malsawmna tawngtaina BMCF Vice President Rev Dr. K Sapthanga chuan a nei a, chawhlui kilhona in a chhunzawm nghal a ni.

Bangalore-a Mizoram House chu April ni 20 (Nilaini) hian hawn a ni dawn ta.  Mizoram sawrkarin Bangalore khawpuia Mizo mipuite tana innghahna tur Inpui tha tak mai, damlohna avangte, zirna leh hnathawhna avangte a Mizotena kan chhawr em em tur an rawn dah hi Bangalore Mizo te chuan lawmawm kan ti hle ani.

Inrinni (April ni 16) khan Senior LO, Pu Talo Rosanga pawh he Mizoram House hawn dan tur chungchanga thil tih fel ngai leh hmalak ngai te buaipui turin Kolkata atangin a rawn chhuk a. Tin, Mizoram sawrkar in Bangalore Mizo Association te chu he hun atana ruahmana te lo siama, a tul apiang lo buaipui tura a ngen angin nimin Inrinni (April ni 16) vek khan Pu Talo Rosanga hoin meeting chu Mizoram House turah hian an nei nghal bawk ani.

Nilaini tlai lam dar 5pm ah Mizoram House Hawnna Inkhawm hi neih a ni anga. Inkhawm chu Pu Talo Rosanga, Senior Liaison Officer, Kolkata in a kaihruai anga, Chief Guest tur chu Pu Lalthanzara, Hon’ble Parliamentary Secretary to Chief Minister, Government of Mizoram a ni ang. Tin, Pu Lalrinliana Sailo, Minister i/c Health, etc. pawh he hun hmang tur hian a lo kal dawn bawk a ni. He hawnna inkhawmah hian report te leh thusawi tawi te te ngaihthlak a ni anga, tin zai mawi tak tak te pawh ngaihthlak tur a awm dawn a ni. House lawmna ruai chu zan dar 8pm ah theh tura ruahman a ni bawk.

Bangalore Mizoram House ah hian bed room panga (5) a awm a, Hall pahnih awmin kitchen leh dinning hall nuam tak a awm bawk a ni. Ground floor lamah chuan Mipa awmna tur dormitoty siam a ni a, 1st floor ah Hmeichhe awmna tur dormitory siam a ni bawk a ni. A In a lianin room te pawh a lian tha hle a, thlen pawh nuam tak tur a ni.

Mizoram House Chanchin tlem…

Mizoram mipuiten Bangalore khawpui kan mamawhna, damlohna thilah te, hna tha zawk thawhna thilah te leh zirna lamah te, a lo lian ta hle mai a. Tunah chuan Mizo mipuite tana thlamuang taka chawlhna leh innghahna tur In kan nei dawn ta ani. Kum 2008-2009 atanga tun hun thlenga Bangalore Mizo Association hruaitutena kan ram roreltute hnena an lo ngen thar lehna leh an lo beisei thar zelna chu tunah chuan a tak hmuh tur a awm dawn ta a ni. Mizoram roreltute chungah Bangalore Mizote kan lawm hle a ni.

Ningani (9^th December 2010) khan Mizoram sawrkar aiawhin Pu Talo Rosanga, Senior L.O., Kolkata Mizoram House chu Bangalore-ah a lo kal a. Zingah Airport-ah lo thlengin kan President Rev. C. Vanlaldika hoin, Rev. B. Zohmangaiha leh Rev. J. Lalduhawma te’n an lo hmuak a. Hemi ni vek chhun dar 2 ah In neitu Pu Kishore te nen chuan Inluah inremsiamna chu, a man te leh peklawk ngaite in pe felin an ziak fel ta a ni. Hemi ni vek hian Mizoram House tur pawh Pu Talo Rosanga hoin en a ni a, chahbi pawh in hlan fel nghal a ni bawk. In neitute nena tihfel ngai zualpui chu hemi ni hian tihfel nghal a ni. Senior L.O. Pu Talo Rosanga chu zan riaka a tuk Zirtawpni chawhnu lama haw turin ruahmanna siam a ni a, kan senior member Dr. Lalrinawmi Ralte in a mikhual a, a tuk Zirtawpni chawhnu dar 3 chuan Kolkata lam panin min hawsan ta a ni. A hun hlu tak seng a House tur chungchang thil tam tak a rawn tifel hi Pu Talo Rosanga chungah Bangalore Mizoten lawmthu kan sawi bawk e.

Tuna Mizoram House tur hi luah (rent) mai a la ni a, inremsiamna pawh kum 3 chhung atan chauh siam lailawk a ni. Bangalore khawpui hi kawng hrang hrangah Mizoten kan mamawhna a nasa hle tawh mai a, a hmun nghet neih hma a hetianga thil tha tak mai kan ram sawrkar hruaituten Zoram mipui tana an ruahman hi a tha hle mai. A hmun nghet zawk kan neih thuai theih nan Bangalore Mizo khawtlang mipuite pawh tang tlang zel turin kan in ngen e.

Mizoram House hi thla khatah Rs. 80,000/- (Sing riat) a luah a ni a. A enkawltu turte pawh Mizoram sawrkar chuan a rawn tifel thuai ang tih kan beisei a. A In hi chhawng khat niin room lian tak tak 5 lai a awm a. A awmna hi Bangalore chhim chhak lam niin, National Games Village atanga 80 feet Peripheral Road a tlan phei zelin veilama pen luh a ni a.

Mizoram House hi a hmun nghet tura state sawrkar te pawh inbe zel an ni a. Kan Chief Minister zahawm tak Pu Lal Thanhawla ngei pawhin BMA in Silver Jubilee kan lawm tum (October 2009) khan Karnataka state roreltu te a hmu tawh nghe nghe a. He In, a hmun nghet kan neih hmaa a luah tala Mizote mamawh House kan ram roreltuten min ruahman sak hi Zoram mipuite mai bakah helai hmuna awm Mizote tan hian a tangkai dawn hle a, a lawmawm hle a ni. A hmun nghet tur hi kan nei thuai turah pawh ngai ila, helai Mizo khawtlang pawhin hemi atan hian theihpatawp i chhuah zel ang u.

Mizoram House address leh Phone number:

#311, 6th Main, 6th Cross, S.P. Bed Layout, Koramangala, Bangalore-34.

Reception: 080-2550 4815

Pu Ajay Kumar, LO: 080-2550 4823

Fax: 080-2550 4830

Bangalore Mizote Atangin Lehkhabu Thar

ZORAM THAR A AWM THEI ANG EM?

Bangalore Mizo Association buatsaih lehkhabu “Zoram Thar A Awm Thei Ang Em?”tih chu February 27, 2011 khan J.R.C. Hall, United Theological College, Bangalore-ah tlangzarh a ni ta. He lehkhabuah hian article 24, mi hrang hrang ziakte a chuang a. Zoramin hmel thar pua hmasawnna kawng a zawh zelna kawnga lehkhabu tangkai tak ni tura ngaihah hian tunlai huna kan ramin harsatna a tawh hrang hrang chik taka zirna leh chumi laka kan himna tur thu tha tak tak a chuang ani. Zoramin hmel thar a put theih nana Bible zirtirna pawimawhzia te, hnam nun ze tha leh rorelna dik hlutzia te, chhungkaw tha leh inenkawlna awmze nei leh hnam hmasawnna tur thu tangkai tak tak a chuang. He lehkhabu phek 366 zeta chhah, a kawm chhah nalh taka  tuam hi Rs. 200/- man chauh a ni ang.

Bangalore Mizo Association hi kum 1994-a din a ni a, Thu leh hla hmanga Mizote hmasawnna tur ngaihtuahin CHINLUNG MAGAZINE pawh vawi 15 a chhuah tawh a. Chuta chuang thu leh hlate chu Zoram thar dinna kawnga mite nun kai harhtu pawimawh tak a ni hlawm a, THU THLUR BING huanga thu ziak leh sawihote chu mite an hlut hle thin a ni.

Abstract

Zoram Thar a awm thei Ang Em? tih hi khawtlang nun siamthatna lam hawi lehkhabu a ni a, kan ramin hmel thar pua hmasawnna kawng dik a zawh zel theihna tur thu tha leh tangkai chi hrang hrang 24 zet chuanna bu a ni. A ziaktu tam ber hi doctoral research bei mek leh zo tawh te leh mahni kalna zawna thiamna bik neite an ni fur a, a tam ber hi Pathian thu zirna leh College/University lama zirtir hna thawk leh zir mek te, sawrkar leh company liana hna pawimawh tak chelh te an ni hlawm. Chu vang chuan an thu leh hla hian chhiar ngei a phu a, belhchian pawh a dawl ngei ang. Khawtlang nun siamthatna atana Bible leh theology, zirna, hnam nun ze tha, chhungkaw inenkawlna tha, sex education pawimawhna leh thil dang pawimawhzia kawngkal fel tak leh fiah taka ziakna a ni ber. Bangalore Mizo Association buatsaih he lehkhabuah hian tun hma lama Zofaten kan hmuh phak loh zirtirna tha leh thu thar engemaw zat chuang khiau maite hi  a vângin a ngaihnawm hle.

Zoram thar nghah thu leh khawtlang nun siamthat lam chuanna bu hi kan lo hmu tawh thin a, tuna lehkhabu thar lo chhuak leh ta hi Mizoram pawn atanga chhuah a nih avangin a lehkhabu pianhmang mai ni lovin an thu sukthlek dan pawh kawng tam taka danglamna a awm.

A bu chhung thu thenkhat te chu…

• “He theology hi chuan Pathian Ram dikna leh felna a hmachhuan ang a, mi lian leh hausate thianah siamin a tlawn lo vang, mi sual thiltitheite a zuah hek lo vang a, mi retheite dikna a palzut ngai lo vang.” (p. 26)
• “Mi pakhatin In Hmun Pass sawm chuang chuang a neih laia vakvai eng emaw zat lo awm si hi a thlarau lo em em a; dikna (justice) kan tih nen phei khi chuan a inkalh hulhual a ni.” (p. 42)
• “Isuan Galili thingtlang mite a hmangaihin rawng a bawlsak a ni. An zingah a cheng a, aikal a ruai ve lo!” (p. 71)
• “Globalized leh Postmodern khawvelah Zoram thar kan ti maw?” (p. 73)
• “Senority list-a chuang pha chin, Principal leh Headmaster nih inbeisei pha chin pawh nise, sikul tan an tha dawn em tih finfiahna tur Exam engemaw tal paltlang ngai awm se …” (p. 91)
• “Necktie leh kawrchung te hi sakhaw thil nge culture?” (p. 167).
• “Vai te, Sap te, Japanese ten an neih ve loh thil tha tak tak kan neih hi hmusita hnualsuat mai loin i uar sauh sauh ang teh ang u.” (p. 192).
• “Lal Isuan Kohhran pakhat a din a, keinin phel hransain kan dawng si a…” (p. 236)
• “Zoramthanga lar laia, ‘khaw nge in awm a,’ an tia zawhna tawn changte Mizoram mi kan ni tih an hriata, “Jouramtangga’ an tih ve thin khan Mizo nih a tinuam …” (p. 267).
• “Naupangte hian hmangaihna hi hi ‘H-U-N’ tiin an sipel tlat nia!”(p. 308).
• “I fanu-fapa khan ‘You make me want to be a better man/woman’ a ti thei asin!” (p. 329).

MIZO SUPER LADY MUANPUII BANGALORE-AH

“Ka nun kal zel turah pawh Pathian ta nih ka duh” – Muanpuii, IFS

A naupan lai chuan IAS officer fanu cute a nia. A lo nulat chhuah hlim musician hmingthang, khawvel huapa zaia rawngbawl pha a ni. Tichuan, a lo puitling a, IFS officer chhuanawm tak a lo ni ta. BMA News Network (BNN) lamin Mizoram hmeichhe zinga IFS hmasa ber leh kan neih chhun, Nl. Muanpuii Saiawi (MS) hian Bangalore khawpuiah a rawn tum tih ka hriatin a nuta Pu Ramdinsanga Saiawi te inah kan luhchhilh a, darkar thum kan kawm. Ani pawh a hlim, keini pawh kan lawm. Hei le, The Mizo Super Lady kan kawmna chu.

BNN: Tuna i hnathawh hming leh a ken tel hna pawiawh, please …

MS: Kan thawhna hmun hi Indian Embassy (Seoul, South Korea) a ni a, ka hna hming chu Second Secretary (Political) a ni, chu chu Under Secretary level a ni. Ka hnapui ber chu India leh South Korea inkara political relations tihchak a ni a. Tin, Head of Chancery ka ni tel bawk a, Indian Embassy-a administrative leh financial zawng zawng ka enkawl a, Press Information leh Cultural Relation pawh ka la tel bawk.

BNN: Korean economy hi a thang duang hle mai a, an work culture that vang a ni em?

MS: Ni e, kum 1950 khan Korean War a awm a, chutih lai chuan khawvel chu sawi loh, Asia-ah pawh ram rethei berte zinga mi an ni a. An taimak em avangin 1970 atang vel tawh khan ram rapid economic growth an nei tawh a, tunah chuan khawvel ram hausa ber zinga mi a ni tawh a, a chhan bulpui ber chu an taimak em vang a ni. An taima em em a, an sincere a, an entawn tlak khawp mai.

BNN: An Kohhran chanchin leh an thlarau lam dinhmun …

MS: Korea rama cheng chanve vel zet khi Kristian an ni. Mizoram ang deuhin veng tinah Biakin leh Cross a awm. Anniho chu an rinawm, an inkhawmte hi thahnem an ngai a, an la serious hle bawk. Inkhawm pawh an thahnem a, zing tawngtai inkhawm an ngai pawimawh hle bawk. Thalai ten Praise & Worship an ngai pawimawh a, Small Cell Bible Study te, music leh thil dangah an inhmang ve nasa a, Mizote nen kan inang khawp mai.

BNN: India Look East Policy hi le …Korea leh India relation-in a chhawrin i ring em?

MS: India hian tun hma lamin khawchhak ramte hi kan lo uksak tawk lo va, tunah chuan Northeast Asia bakah Southeast Asia a dah pawimawh tial tial a, chumi zingah chuan S. Korea pawh a tel a. Kumtir khan Korea President pawh Republic Day lawmnaah Chief Guest-ah kan sawm a. Comprehensive Economic Partnership Agreement (i.e. Free Trade Agreement) kan tan a. S. Korea nena kan trade relation hi a sang em em a, 15 billion dollar aia sang bilateral trade kan nei a ni. Tin, defence relations-ah pawh Korea nen hian kan inkawp tha hle. Korea ram hi kan tan a pawimawh chho zel dawn.

BNN: Korean Wave in Mizoram … min comment sak thei em?

MS: Ni e, Korean-ho hian an culture promote nan Arirang TV te an nei a, heng hi kan lo dawng ve thin a. Korean wave an ti, an movies te, an pop star te an export nasa em em a ni. Asia , Europe leh ram hrang hrangah Korea culture hi a lar zel a, Mizote hian kan lawm em em a ni. Chuan …Korean thalaiho ka hmuh dan a tha lam sawi phawt ila. An taima a, lehkha zir an ngai pawimawh a, part-time job an ti a, taima tak leh rinawm takin lehkha an zir a, an pocket money tur an intuak a, an polite em em bawk. Aia upa zahna a sang a, an nun a mawi ka ti. Amaherawhchu, Korean thil zawng zawng hi ngaih san vek tur a ni chuang lo va. An changkang a, materialism pawh a sang a, incheinaah te an sang lutuk a, plastic surgery te an uar a, entawn loh tur lai pawh a awm ang.

BNN: A nih leh Big C hian a tibuai ve em?

MS: Korea ramah pawh corruption a awm ve, mahse a sang lamah a awm a, common man zingah chuan corruption a tam lem lo, mipui tibuai tham chuan a nasa ve lo.

BNN: North vs South Korea Indo a hnai em?

MS: Ni e, November thla khan N. Korea khan S. Korea lama thliarkar pakhatah artillery kha an kap a, chu chuan tension a ti sang hle. Indo a chhuak hial dawn em tiin kan ngaihtuah a. Indian Embassy lam pawhin kan mi leh sate kan contact a, thil duhawm lo a chhuah hlauhva tih dan tur kan ngaihtuah a ngai a; indo tak erawh chu a chhuah loh a rinawm. A chhan chu North lam hian internal problems a nei ve a, an ram hruaitupa khi a upa ve ta deuh a, amah thlaktu atan a fapa a duh a, leadership change a awm dawn avangin an problem divert a ngai a, outside enemy siam a tum a ni ber. Kan thiante pawhin indo em chu chhuak lo turah an beisei ve.

BNN: World Cup lai kha le, a boruak tiah tiah em?

MS: E, a nuam khawp mai! World Cup khan Central Square-ah big screen-in an en a, thalai an pung khawm a, an ram kawr rawng a sen an ha a. An first match khan ruah a sur a, chuti chung chuan an lo kal teuh tho. Kan Mizo thalaite ang chiahin football hi an ngaina, an rilru leh an thinlung zawng zawng hi an pe ve a ni.

BNN: Tawng hi i thiam nual em, Korea tawng bakah European tawng lamte pawh?

MS: IFS-a kan luhin tawng pakhat kan zir ngei ngei a ngai a. Kum 2007-a Korea ka thlen chhoh khan Korean tawng kan zir phawt a, lawmmante ka pawh ka dawng ve hial a. Tawng zir hi nuam ka ti a, an hlate ka zir a, Korea tawngin Bible te ka chhiar a, ka thiam ve ta viau.  European language chu school leh college-ah French ka zir a, Celebrants-a ka chhuah khan Spanish tawng hmanna ram kan fan avangin (Spanish kha French nen a inhnaih viau bawk a) ka thiam hma ta viau a, Italian tawng pawh  ka thiam ve nual a; chuan … tawng dang pawh zir zel ka la tum.

BNN: BMCF Praise & Worship-ah i testimony kan lo thlir asin! “It’s well …” ngei mai kha? I testimony a la ni zel em?

MS: Pathian hi ka chungah a tha a. Ka nu leh pa ten Krista rinnaah min hruai a. Ka tleirawl khan Pathian hi a takin ka hmu ve a, dam lohna karah Lal Isua hmel ka hmu a. Mangang takin Pathian ka au chhuak a, Thlarau Thianghmlimin min rawn thuam a, chuta chin chu ka conviction hi a inthlak lo. Engtik lai pawhin – ka hlim emaw, harsatna ka tawk a ni emaw, Lalpa nen chuan a ropui a ni. Chu vangin engtik lai pawhin “It’s well with my soul” tih ka sawi thei a ni. Ka testimony hlui a ni a, tun thlengin ka testimony a la ni reng. Ka nun kal zel turah pawh Pathian ta nih ka duh. Pathian malsawmna hi mi dang tana hman ve ka duh a ni.

BNN: Bangalore-ah Mizo sang rual tehmeuh kan awm ve, eng thu nge min chah i duh?

MS: Bangalore Mizo thalaite hi in vannei em em a, Bangalore tluka opportunities thatna – zirna a ni emaw, hnaah a ni emaw, a tam lo. Heti khawpin in nihlawh a ni. Thlarau lama inpawlhona turin BMCF(Bangalore Mizo Christian Fellowship) in nei bawk a. Kan rinna hi englai mahin thlahthlam lo ila, inchawkphur ila; tin, Pathian hre lote zingah kan awm a, kan awmna hmun hi mission field a ni. Miin Lal Isua hmel an hmuh theihna tur khawpa kan nun that a ngai a, taihmak a ngai a, thiante tana inpek zawh a ngai tih hi ka chah duh che u chu a ni.

Nl. Muanpuii Saiawi IFS

Mizoram mipuiten Bangalore khawpui kan mamawhna, damlohna thilah te, hna tha zawk thawhna thilah te leh zirna lamah te, a lo lian ta hle mai a. Tunah chuan Mizo mipuite tana thlamuang taka chawlhna leh innghahna tur In kan nei dawn ta ani. Kum 2008-2009 atanga tun hun thlenga Bangalore Mizo Association hruaitutena kan ram roreltute hnena an lo ngen thar lehna leh an lo beisei thar zelna chu tunah chuan a tak hmuh tur a awm dawn ta a ni. Mizoram roreltute chungah Bangalore Mizote kan lawm hle a ni.

Ningani (9th December 2010) khan Mizoram sawrkar aiawhin Pu Talo Rosanga, Senior L.O., Kolkata Mizoram House chu Bangalore-ah a lo kal a. Zingah Airport-ah lo thlengin kan President Rev. C. Vanlaldika hoin, Rev. B. Zohmangaiha leh Rev. J. Lalduhawma te’n an lo hmuak a. Hemi ni vek chhun dar 2 ah In neitu Pu Kishore te nen chuan Inluah inremsiamna chu, a man te leh peklawk ngaite in pe felin an ziak fel ta a ni. Hemi ni vek hian Mizoram House tur pawh Pu Talo Rosanga hoin en a ni a, chahbi pawh in hlan fel nghal a ni bawk. In neitute nena tihfel ngai zualpui chu hemi ni hian tihfel nghal a ni. Senior L.O. Pu Talo Rosanga chu zan riaka a tuk Zirtawpni chawhnu lama haw turin ruahmanna siam a ni a, kan senior member Dr. Lalrinawmi Ralte in a mikhual a, a tuk Zirtawpni chawhnu dar 3 chuan Kolkata lam panin min hawsan ta a ni. A hun hlu tak seng a House tur chungchang thil tam tak a rawn tifel hi Pu Talo Rosanga chungah Bangalore Mizoten lawmthu kan sawi bawk e.

Tuna Mizoram House tur hi luah (rent) mai a la ni a, inremsiamna pawh kum 3 chhung atan chauh siam lailawk a ni. Bangalore khawpui hi kawng hrang hrangah Mizoten kan mamawhna a nasa hle tawh mai a, a hmun nghet neih hma a hetianga thil tha tak mai kan ram sawrkar hruaituten Zoram mipui tana an ruahman hi a tha hle mai. A hmun nghet zawk kan neih thuai theih nan Bangalore Mizo khawtlang mipuite pawh tang tlang zel turin kan in ngen e.

Mizoram House hi thla khatah Rs. 80,000/- (Sing riat) a luah a ni a. A enkawltu turte pawh Mizoram sawrkar chuan a rawn tifel thuai ang tih kan beisei a. A In hi chhawng khat niin room lian tak tak 5 lai a awm a. A awmna hi Bangalore chhim chhak lam niin, National Games Village atanga 80 feet Peripheral Road a tlan phei zelin veilama pen luh a ni a. House address chu – #311, 6th Main, 6th Cross, S.P. Bed Layout, Koramangala, Bangalore-560034.

Mizoram House hi a hmun nghet tura state sawrkar te pawh inbe zel an ni a. Kan Chief Minister zahawm tak Pu Lal Thanhawla ngei pawhin BMA in Silver Jubilee kan lawm tum khan Karnataka state roreltu te a hmu tawh nghe nghe a. He In, a hmun nghet kan neih hmaa a luah tala Mizote mamawh House kan ram roreltuten min ruahman sak hi Zoram mipuite mai bakah helai hmuna awm Mizote tan hian a tangkai dawn hle a, a lawmawm hle a ni. A hmun nghet tur hi kan nei thuai turah pawh ngai ila, helai Mizo khawtlang pawhin hemi atan hian theihpatawp i chhuah zel ang u.

Photos:

View Larger Map

Note: Map hi communication gap vangin duh angin kan rawn dah accurate thei lova, a rang thei ang bera rawn update tum ani e.