Bangalore Mizo Minu Pawl

Bangalore Mizo Minu Pawl (BMMP) hian Mizo Minu leh Mipa zawng zawngte thatna tur leh hmasawnnna zawn hi a tum a ni.

  A lo din dan

February ni 15, 1992 chawhnu dar 2:30 khan Pi Lalnunmawii ( w/o Pu R.L.Rinawma, IRS ) te inah Bangalore Mizo nu leh nula kalkhawmte chuan lungrual takin tuna BMMP kan tih tak hi an din a, a hmingah WOMEN FORUM tih a ni. Bangalore Mizo Women Forum tih emaw Bangalore Mizo Minu Pawl tia pawh fan leh tak hi chu a hnu fe ( kum 1996 ) hnu lama awm a ni thung.
 

  A din chhan leh a tum te

1. Sakhuana leh Nitin nun (Religion and Secular) a huam vek a ni. Thlarau lama hmasawnna ngaihtuah a ni a, tawngtai dah pawimawh a ni a. Tisa lama kan mamawhte, a tul anga infuih leh hmangaihna leh lainatna mite chunga lantir a ni bawk. Natna leh harsatna dang tuarte pawh theih ang anga tanpui a tum a ni.
    

2. Inlaichin tawnna atana BMMP hi din a ni a. Bangalore-ah hian tihtur neiin Mizo kan lo awm ve diah diah a. Chhungkua pawh a nghet lem lova awm tawk kan awm ve reng a, kan la awm zel dawn niin a lang bawk a. Nula zirlai pawh kum tinin an inthlak chho zut a. Mihring kan in hre lovin kan inhlat tial tial nia lang hi engtinnge kan tihbo theih ang? Nula leh nuho zingah innelna tha, inlaichinna leh inpawh tawnna tha zawk kan neihna kawng zawn hi BMMP chuan a tum a.
    

  Hruaitu Hmasate

February 15, 1992 a kalkhawmte chuan hruaitu thlanna an nei nghal a.
Hetiangin: Pi R.L. Hnuni, Pi Lallianpuii, Pi Zomuani leh Pi Zothankhumi te an ni.
 

  Membership

BMMP-ah hian Bangalore-a Mizo nu leh nula a duh apiangte member a nih theih a.
Membership fee chu Rs.5/- a bul tan a ni a. Kum 1997 atang khan fee pe tawh lovin Lawm Bawm lakkhawm a ni ta zawk a.
 

  BMMP kum 15-na

BMMP hian kum 15 hmel a lo hmu ta reng a. Kum 15 chhung hian kum tinin activities tam tak a nei a, memberte hi inthlak kumtin an nih angin an mamawh leh duhte, ngaih pawimawh te a dang thin a. A tlangpuia pawl anga an thawh thinte chu kawng hnihin a thliar theih a, pakhatna chu anmahni puala programme hman thin a ni a, pahnihna chu midangte tana in hman a ni.
 

  BMMP puala programme hmante

Thlahnih dana inhmuhkhawm hi an tlin tawk a la ni hrih a. Member tam zawk hi lut leh chhuak reng an nih avangin Bangalore-a an awm chhunga an zir chakte zirna an nei a, chungte chu – cake siam, soup siam, chawhmeh siam dan chi hrang hrang, card siam, dry flower siam, thil vawnthat, pangpar khawi, beauty tips te, member intlawhchhuahte, nula hostel-te tlawh te, thilpek leh tanpui an ngaih ang anga tanpui thin te a ni.

Thlarau nunah chuan – Bible study neih, Tawngtaiho, Pathianthua inpawlho, Pathian hla saa midangte tlawh, missionary report te, mission challenge te an ni.
 

  Midangte tana inhmanna

BMMP-te hian midangte tanpui nan theihtawp an chhuah ve a. Fahrahte tanpui, tar dahkhawmnaa Krismas thilpek leh tihhlimte, miretheite dinhmun zirchian leh tanpuite. June 2000 atang khan fahrahte tanpui nan Buhfaitham an lo tan tawh bawk a, rokhawlhna avangin 2002 -2003 khan tihtawp a ni leh a. Kum 2003 leh 2005 khan Calendar siamin fahrah tanpui nan bawk an lo thawk chhuak tawh bawk a.

December 1, 2006 khan fahrahte tanpuinan Gospel Concert buatsaih a ni a, Mizo tlangval zaithiam tak leh Pathianin a hman mek Tv. Vanlalsailova chuan a hmanpuia, Bangalore Mizo leh tlangmi mipuiten an lawm hle a ni. Heta tanga hlawkna awm chu fahrah in pahniha sem a ni.
 

  Vakiria

Vakiria hi BMMP Newsletter a ni a. August 1995 atang khan tihchhuah tan a ni a. Vakiria tih hi Dr. Lalrinawmi Ralte phuah a ni a, editor hmasa berte chu – Dr. Lalrinawmi Ralte leh Nl. Lalmuanpuii, M.Th te an ni. A hnuhnung ber Issue 59-na chu November 2006 khan tihchhuah a ni.

Top ▲