Bangalore Mizo Christian Fellowship

  A Din Tan Dan

July 27, 1975 Pathianni khan UTC-ah Bangalore Mizote MZP hmingin an kalkhawm a. An inkhawmna chu Pu Rin Sanga IAS, MZP President chuan a kaihruai a. Thu tam tak an rel hnuah Rev. Lalsawma chuan dingchhuak meuhvin rawtna a rawn siam a. Chu a rawtna chu ‘Bangalore a cheng Mizote a huhova inkhawm thin’ a ni. Memberte chuan a rawtna chu an phurpui hle a. Chawlhni tinin Bangalore-a Zo hnahthlak awm zawng zawng ten a huhova Pathian biakhona neih thin ni se tiin an rel ta a. MZP chuan social lam a khawih avangin a hranga awma, hruaitu pawh a hranga inthlan tha zawkin an hria a. MZP pual chuan thla khata tumkhat inkhawm chu neih an remti tlang ta a. Tichuan Mizo Inkhawm hruaitu turte chu an thlang ta nghal a. Chairman-ah Rev. F Hrangkhuma, Secretary Pro. Pastor Zaihmingthanga, Treasurer Tv Raldawna. Inkhawm hmingah hian “Bangalore Mizo Inkhawm” tih a ni.

Bangalore a Mizo Inkhawmna hmasaber chu Chawlhni August 4, 1975 ah UTC Chapel-ah neih a ni a. He Inkhawmah hian Chairman chu Rev. F Hrangkhuma a ni a. Secretary Pro. Pastor Zaihmingthanga’n thu a puang a, Thuhriltu chu Rev. Lalsawma a ni. Inkhawm zawng zawng puitling 11 leh naupang 5 an ni a, thawhlawm tlingkhawm chu Rs 6.35 a ni. Hemi ni atang hian Pathianini tinin inkhawmna neih zui a ni ta a ni.
 

  Inkhawmna hmun

Inkhawmna tam ber chu UTC Chapel a ni a. Chapel hi a rem loh changte a awm thin tak avangin mimal inah te an inkhawm thin a, hostel room-ah te pawh an inkhawm chang a awm bawk thin. Chutianga an inkhawm tawh thinna hmunte chu: Pu C. Rosiama room, Rev Hrangkhuma In, Pro Pastor Zaihmingthanga In, Pu Hualzika In, Holy Cross Brother’s Convent, Pu H Vanlalauva In, Pu Ginchinzama In, Pu GK Nanga In, Pu Zopianga In, Pu HT Sangliana In, Rev M Kipgena In, Pu Mithrana leh Pu Rin Sanga In te an ni.

Kum 1986 atang khan Assembly of God Biak Inah an inkhawm leh a. December thleng chauh inkhawm an phal avangin Wesley Church, Promenade Road, Frazer Town, Bangalore 560005-ah an insawn ta a. Vawiin thlengin hetah hian kan inkhawm ta a ni.
 

  Inkhawm kalphung

Inkhawm hi chi hrang hranga buatsaih thin a ni a. Chungte chu: Thupui neia inkhawm, Bible Study, Character Study, Biographical Preaching, Fellowship leh Special numbers te a ni. Kum 1984 khan Puitling Sande Sikul thla khatah vawikhat neih thin a ni a. Kum dangah chuan chhunzawm a ni ta lem lo.

Inkhawmnaa chanvo: BMCF hian a dintirh atangin mi tute pawh, Pathian rawngbawl chak mi, a thei awm te leh inpete chu iai lovin an rawngbawlna awm a buatsaihsak zel a. Mipa leh minu emaw, thalai leh upa emaw inthliarna a awm lova, ordained leh lay inthliarna a awm hek lo. Mani phak tawk leh Pathian kohna ang zela rawngbawltute pawh kohchhuah an ni thin.

Special numbers: Inkhawma Special Numbers hi 1994 atangin a lar zual a. Hei hi a pawimawha hriatna chhan a awm a, a chhan chu mimal talent zawnna leh an talent neih anga Pathian rawngbawl nana hmang tura inbuatsaih tirna a ni.

Thuzir: Kum 1990 khan Bible Study a awm a, thuzir chu Amosa a ni a, zirtirtu chu Rev. Dr Zaihmingthanga a ni. Exam pawh buatsaih a ni a, result te pawh puan a ni.

Tawngtai rual: Kum 1989 chho atang khan inkhawm apiangin tawngtai rualna neih a ni thin a. Kum 1990 chho atang erawh chuan thlakhatah vawi hnih chauh subject neia tawngtai rual hi neih thin a ni ta a ni. Vawiin niah erawh chuan tawngtai rual hi thlathar Pathianni hmasaberah chauh neih thin a ni tawh.
 

  Gender Roles

Secretary atan Nl. Hmingthansangi leh Nl. Lalrinawmi te hman an ni tawh a. Treasurer leh Finance Secretary atan Pi Rinteii, Pi Thianghlimi, Nl. Vanlaltlani, Nl. Saichhungi, Nl. Hmangaihzuali Hauhnar leh Nl. Lalnghakthuami te hman an ni tawh bawk. Tawngkam pawh hi inclusive language hman a lo ni tawh thin a. October 17, 1983 te chuan hruaitu minu anih chuan ‘Chairperson’ an lo ti daih tawh a ni.
 

  Biscuit Sem

Kum 1989-a Assembly of God Biak In atanga Wesley Biak Ina an insawn khan anmahnia thingpui inlumchawp a ngaih tak avangin a hautak ta sawt a, chuvangin thingpui in apianga biscuit sem chuan sawiho a hlawh ta a. Biscuit sem loh an tih chuan naupang dawng lutuk tur an ngaingam chiah si lo, sem zel dawn se a hautak si; chuvangin biscuit chu naupang tan chauh an sem ta a. Amaherawh chu chutia naupang biscuit sem thin chu puitlingho chuan enliam mai harsa an lo ti ta a, an vaia ei turin August 9, 1980 atang chuan an sem leh ta nge nge a. An thawhlawm a tlem tham si, biscuit ei bawk chuan sawiho a hlawh leh ta a. Khatih hunlai vel te kha chuan khawnvartui thuk hmangin thingpui an lum a, khawnvartui black-a lei tur an hmuh loh changin family ration card hawhin thingpui an lum ve tawk tawk a ni si a. Chutiang taka an la harsat avang chuan November 1993 atang chuan Biscuit tel lova thingpui in an ti tlu leh ta a. Kum 1994 atang erawh chuan vawiin ni thlengin biscuit chu inkhawm ban thingpui sem apiangah sem tel zel a lo ni ta a ni.
 

  Thilpek

Inkhawm neih tirh atangin thilpek hi tan nghal a ni a. Heng thilpekte hi inrelbawl nan leh rawngbawlna chi hrang hrang atan hman a lo ni tawh thin a. Thilpek lamah hma pawh kan sawn nasa em em a ni. Inkhawm hmasa berah khan puitling 11 leh naupang 5 an inkhawm a, thilpek tlingkhawm chu Rs 6.35 a ni a.
 

  Thilpeka rawngbawlna

Thilpeka rawngbawlna hi BMCF hian a ngaipawimawh em em a; a tlem leh a tam chu thuhran ni se, rawngbawlna a neihte tarlang ila:- Bidar District-a ramhuai man te hnenah Bible leina , Synod Hospital Durtlang, Arunachal rama thlarau bo zawngtute rawngbawl nan, Diphu tirhkohte hman atana thirsakawr lei nan, Thlarau Bo Zawngtute Missionary Pu Lalbiakliana leh Pu Lalremruata te Madhya Pradesh, Tripura rama Junior Hihg School kang sak that lehna, Tripura rama duplicating Machine lei nan, Sidapur slum-a Pathin Biak In sak that nan, Tripura rama Missionary Gobindro Debbarma tanpui nan, Nahbunsiam Kaipen, Tripura Missionary, Kawlchungbul, Arunachal rama Bible thawn nan, Manipur Presbyterian Mission, Damdawiin Bill tanpui nan, Bible Society, Christian Literature Ministry, Sihkanan Christian Hospital, Bethel Gospel Church, Durtlang Hospital, Tripura Presbyterian Church, Arunachal Mission Compound, Explo’85, Peace with God Convention, Assembly of God Church, St Mark’s Old Age home, KSM, Wesley Kohhran Old Women’s Home, Mission for Evangelism, Education and Training, Assembly of God, Goodwill Girl’s High School, St Andrews Church Slum, SCM Platinum Jubilee, Guwahati Mizo Kohhran, Chhandamna In, Mizo Synod, Medico Pastoral Association hostel sakna, Goodwill High School, UTC, Tura Mizo Kohhran Bible, PMCF (Pune) Gospel Camping, Wesley Church Thanksgiving Festival, SCM YWCA, CSI Women’s Home Anniversary, Gujarat Christian Missionary-te, Mizoram chhimlama leimin tuarte, Freedom Foundation. Heng bakah hian mimal tamtak tanpui an ni.
 

  Zaia rawngbawlna

Mizo Inkhawm tan phat atang hian Pathian hminga zaia rawngbawlna hi neih a ni a. Kum hmasa ber 1975 Krismas chuan hmun thumah Bible Society Programme, Bible Sunday, Tamil Evangelical Lutheran Pavanaser Church-ah zaia rawngbawlna neih a ni a. Hla hruaitu chu Pu Rin Sanga a ni a, a vai lauh lauh thin. A kum leh 1976 February-a Bible Society Programme pawimawh takah pawh Mizo Inkhawm chu thu leh hlaa rawngbawl tura sawm an ni a. Pu HT Sangliana, IPS-in thu a sawi a, Pu Rin Sanga IAS-in hla a hruai a ni.

Chutiangin kan mi hmasate inpekna leh inhawnna avangin mi hriat kan hlawh chho zel a, thu leh hlaa Pathian rawngbawlna kawng a inhawng chho zel bawka. Vawiin ni thleng hian kan chhan sen loh khawp sawmna kan hmu thin hi Pathian malsawmna a ni.
 

  Baptisma

Mizo Inkhawm hian mamawhna avangin Baptisma sacrament a lo nei tawh thin a. July 24, 1983 khan Pro. Pastor Lalsangliana fanu Maria hlanna inkhawm neih a ni a. Maureen Zarzopuii, Pu RL Rinawma fanu pawh ni November 28, 1987-ah baptisma chantir a ni a. January 20, 1991 khan Anita Ruatkimi, Pu RL Rinawma fanu bawk baptisma chantir a ni leh bawk.
 

  Sacrament

Lalpa zanriah sacrament pawh hi kum 1980 October 26 khan neih a ni a, a thehtu chu Rev. Zaihmingthanga a ni. Kum 1989, 1990, 1991, 1992,1993,1994,1995,1996 kum te khan Good Friday inkhawmah Sacrament neih a ni leh a. Sacrament te hi Pastor ordained ten an buatsaih a, a tanpuitu atan ordained, lay minu leh mipate an sawm thin. Kan member zingah sacrament nei ngai lo an lo awm chhoh tak zelah chuan chhunzawm a ni ta lo a ni.
 

  Retreat

Retreat hi thlarau lam atan pawimawh ni a ngaih anih avangin neih a lo ni fo tawh thin a. Retreat hmasaber chu Dec 10, 1984 khan SCM Hall-ah neih a ni. Dec 7-9 1990-ah Vishranti Nilayam-ah neih a ni leh a; October 1999 khan Baldwin Boys High School-ah neih a ni leh a, Rev Vanlalnghaka leh Male Voice(4 members) rawngbawltu atana hman an ni.
 

  Motto

BMCF Motto chu ‘Koinonia’ (Greek tawng) a ni a, a awmzia chu ‘inpawlhona’ (fellowship) a ni. Hei hian BMCF chu ‘kohhran’ (church) ni lovin, ‘inpawlkhawm’ (fellowship) a nihzia a tilang.
 

  Emblem

BMCF emblem chu maicham (altar) anga siam a ni a, hei hian sakhuana thil anihzia a lantir a, a chung zawnah pawl hming BMCF tih ziak a ni. Mizo hnam nunphunga thilpawimawh kristiante inpawlhona-a hman thin ‘khuang’ leh ‘vuak fung’ chu a hnuailamah dah a ni thung a. Hemi chunga rin pahnih inkara mi hi BMCF din kum a ni. Ribbon kual a hmawr ve vea thlepin hnuailamah a dawm kual a, hemi ribbon chhungah hian BMCF motto dah a ni. Greek hawrawpin Koinonia tih ziak a ni.
 

  Hming thlak leh Society Registration

Kum 1984 July ni 1-a Bangalore Mizo Inkhawm Committee chuan he pawl hming hi “Bangalore Mizo Christian Fellowship” (BMCF) tiin a lo thlak ta a, a chhan chu khawtlang nun (social) lam thil ngaihtuahtu tur “Bangalore Mizo Association” (BMA) a lo din tak vang a ni. August 15, 1993 inkhawm chuan Mizo Inkhawm chu society-a in register duhin an phar thlu a, hemi kum vek hian Karnataka Societies Act-ah a in register ta a ni.
 

  Constitution

Kum 1993 khan inthlan dan (election rules) siam rawt a lo ni tawh a, tuna BMCF Constitution hi kum 1998 khan siam a ni leh a, chu chu kum 2000 khan revised leh a ni.
 

  Bank Account neih thu

Bank Account hi Mysore Bank-ah 8.11.1981 khan hawn a ni a, Treasurer leh Finance Secretary te Signatory an ni.
 

  Audit

Thawhlawm ip leh inkhawm apianga thawhlawm lo tlingkhawmte a lo pun chhoh zel avangin kan acount te fel zawk nan, ni 19.9.1981 atangin account hi kumtin audit thin a ni.
 

  BMCF leh BMA inkungkaihna

BMCF leh BMA te hi member thuhmun, nihphung danglam chauh a ni a, chuvangin thukhat vuain hun rei tak atangin an lokal dun tawh thin a. BMA inthlan te pawh hi BMCF inkhawm banah neih a ni mai thin a. Tin, Fresher Social te phei chu Joint Programme-in an lo nei tawh thin a ni.
 

  Wesley and BMCF

Kan inkhawmna Wesley nen hian kawng hrang hranga inkungkaihna kan nei a. Carol Service te, an hun pawimawha inkhawmnaahte tel ve thin a ni. January 10, 1993 hian Wesley and BMCF inkhawm hona neih a ni a, 1996 Krismas Carol Service neihho a ni a, 1999 Krismas Carol Service-ah pawh BMCF zaipawlin rawngbawlna an nei a ni.
 

  Thilpek dawn

Thilpek tamtak BMCF hian a lo dawn tawh a, chu chu Pu Rin Sanga IAS te nupa- thawhlawm khawnna; Subedar Chhawnzova leh a thiante- thingpui inna no 40; Pu Vaivenga- Sande Sikul zirlaibu; Ms Dicky Simmons- Rs 500; Pi Riliani- Rs 2000; Rev Dr Zaihmingthanga te nupa- thawhlawm hlanna tray; Pu T Thanzauva- Khuang.
 

  Sign Board

Kan inkhawmna Wesley Church kawta sign board hi kum 1991 khan Rs 120 senga siam a ni.
 

  Lehkhabu Project

Bangalore hi mizo hnahthlak sawrkar hnathawk leh mithiam tam tak awmkhawmna anih thin avangin BMCF hian lehkhabu chhuah hi Project-ah a lo neih tawh thin a. Kum 1994 khan Mizoram Gospel Centenary lawm nan lehkhabu chhuah project-ah a neih a. A lehkhabu chhuah hming chu “Kum za Kristian Zofate hmabak” tih a ni. Editorial Board-te chu Pu RL Rinawma, Rev Dr Zaihmingthanga, Rev Tlanghmingthanga te an ni. He lehkhabu hi MAL (Mizo Academy of Letters) chuan 1994-a book of the year-ah a puang a. Copy 2000 hralh a ni a, Copy khat Rs 50/- zela hralh a ni. Hemi kum vek hian chhutnawn a ni a, a kum leh pawh hian chhutnawn leh a ni bawk.

Kum 1998-99 (February 1999) khan “Raltiang I Kai Ve Ang” tih a chhuah leh a, Editorial Board te chu Pu Rin Sanga IAS, Dr Lalrinawmi Ralte, Pu Lalrokhuma Pachuau IPS, Pu H Lalhmangaiha, Tv Thalianfaia, Nl Lalnghakthuami te an ni. Copy 2000 chhut a ni a, Rs 50/- a hralh a ni. Heta hlawkna awmte chu hetianga sem tur hian ruahman a ni – Hmangaihna In – Rs. 5000/-, Baptist Nau hnuchham in – Rs. 5000/-, lairam Baptist Nau hnuchham in – Rs. 5000/-, Isua Krista Kohhran Nau hnuchham in – Rs. 5000/-.
 

  Krismas

Krismas hmasa ber chu Rev. F. Hrangkhuma ina hman a ni a. Chawhmain an inkhawm a, ruai an theh bawk. Hemi kum hian Madras leh Vellore-a Zofate an inchahkhawm a. Krismas chawhnu lam chuan mikhual leh tualchhung badminton leh table tennis an inkhel a. Zan lamah ruai an theh leh a. BMCF Krismas ruaitheh hi heta atang hian vawi hnih a ni ta ziah a ni. A tir lam chuan Krismas ni hian thla hi an la fo mai a, thlalak hona hun remchang tak pawh a ni awm e.

Krismas hi an hmang nuam thei em em mai a, mahni khua leh chhungte tel lova hmang an tam zawk thin avangin lungte a leng thinte pawh a ni ang a, Kum 1975 atanga tun thleng hian Krismas hi Pathian zarah nuam takin kan la hmang ziah a ni. Kan hman dan a inang lova, a chang chuan lungleng taka zaikhawm nana hman a ni a, a chang chuan hlimawm lama hman a ni bawk thin.

Tunhma deuh kha chuan zai tlaivar a ni thin a, tun hnaiah hian khawvel boruak danglam chho zel hian khamkawpa zai min phalsak ta lo nia hriatna avangin kham lo takin kan tin thin.Kum 1992 Krismas atangin Newsletter chhuah a ni a, chu chu “Bethlehem Arsi” vuah a ni.
 

  Naupang Sunday School

Naupang Sunday School hi kum 1980 atanga neih tan a ni a. Zirtirtu hmasa berte chu Nl.Hmingthansangi, Nl.Lalmuankimi leh Nl.Lalrinmawii (Lateii) te an ni. Naupang an tam vak loh avangin class pawh pathum chauh siam a ni. Kan Mizo naupang thenkhatten Mizo tawng an thiam that tawk loh avangin class thenkhat chu Saptawnga neihte pawh a awm a. Naupang zirlai hi MSSU ta te, Baptist Kohhran Zirlai leh Lairam Baptist zirlaite an zir thin a ni. Hengte hi kum inchhawka hman a ni.
 

  Property

BMCF hian a tir atangin intodelhna lam a ngaituah em em a, mamawh engkim nei thei lo mah sela, Inkhawmna tithuanawp lo turin bungrua engemaw zat a nei a, immovable lam chu a la nei lo a ni.

Heng bungruate hi inkhawmna hmanrua, zai leh chhepchher, leh thingpui inna atana tangkaite an ni. Entir nan, Hlabu, Bible, Thawhlawm khawnna, No, Tray, Thutthleng sei, Bucket, Seal & Letter head, Zaipawl hla bu, Hot case, Guitar, Thleng, Steel trunk, Buhtlei, Fianpui, Chawhtawlh, Khuang te, Khuang lian, No bwm, Pawisa bag, Steel Almirah, Folding Chairs, Mike stand, Calculator, Dawhkan, Keyboard, Chawei thleng, Gas stove & cylinder, Mike, Keyboard & khuang dahna etc.
 

  Tlangkawmna

BMCF tun dinhmuna dintir thei tura sul lo sutu, hruaitu leh member hmasate lo thawhrimna leh tanrualna a ngaihsanawm em em a. An thahnemngaihna leh inpekna nasa tak chuan tun dinhmun hi min thlen a ni. Kum 31 kal ta chhung khan BMCF hian hruaitu a haihchham ngai lova, member tlawmngai tak tak a tlachham ngai hek lo. Memberte Zoram leh Zo hnahtlak hmun hrang hrang atanga kal khawm kan ni a, Kohhran pawl hrang hrang ni mah ila, BMCF-ah hian ‘pawl rilru’ a awm lova; kohhran pawl pakhat ang chiahin inthurual takin rawngbawlnaah ke kan pen thin a. Hei hi Pathian tanpuina a ni tak zet mai. Hei hi Zoram leh hmun hrang hranga kohhrante tan ‘chona’ ‘challenge’ a tling a ni.

Top ▲