BANGALORE MIZO ASSOCIATION
INKAIHHRUAINA DAN
Preamble: Keini Bangalore-a Mizo awmte hian kan hnathawhna leh zirnaah Zonunmâwi kan vawn zel a pawimawh a, chumi tihhlawhtlinna atan chuan Bangalore Mizo Association hi din a ni.
Chapter I: A BULPUITE
Pâwl hming: Pâwl hming atân chuan “Bangalore Mizo Association”, a lam tawiin “BMA” tih a ni ang.
Dân Hming: He dân hi “BMA Inkaihhruaina Dân” tih a ni ang.
Chapter II: BMA THILTUMTE
2.1 Bangalore-a Mizo awmte inpumkhatna leh thawhhona atâna hmalâk.
2.2 Mizo hnam nun mâwi vawn nun.
2.3 Mizo zinga harsatna tawkte in tanpuia, chhiatni leh thatni a inphungbawm.
2.4 Mizoten kan tihtûr theuhva, a tha thei ang bera ti thei tûra infuih leh inkaihhruai.
Chapter III: MEMBERSHIP CHUNGCHANG
3.1 Member ni theite
3.1.1 Bangalore -a Mizo awmte.
3.1.2 Bangalore-a awm, a nupui/pasal, a nu/pa Mizo a nih chuan member a ni thei ang.
3.1.3 Bangalore chhehvela awmte pawh ‘Non-Residential member’ an ni thei ang.
(3.1.1 leh 3.1.2 a sawi angin)
3.2 Member Dinhmun
Kum 15 chin chunglamin Membership Fee a pe anga, kumtin Renewal Fee a pe tûr a ni. Membership Fee leh Renewal Fee hi Executive Committee in a bituk thin ang. Kum 15 hnuailam erawh chuan Membership Fee a pe lovang a, inthlannaah vote a neilo bawk ang.
Chapter IV: OFFICE BEARERS, INTHLAN DAN, TERM LEH CHARGE INHLAN CHUNGCHANG
4.1 Office Bearers:
Bangalore Mizo Association Office Bearers chu hengte hi an ni ang:-
President, Vice President, Secretary, Assistant Secretary, Treasurer, Finance Secretary
4.2 Inthlandan
4.2.1 April chawlhkâr hmasa bera mawhphurhna (charge) inhlân hman turin, March thla chawhnu lamah inthlan thin tûr a ni.
4.2.2 Inthlan buaipuitu tûr Returning Officer leh Polling Officer tûrte chu BMA Executive Committee-in tûl a tih ang zât a ruat thîn ang. Hêng hna thawk tûrte hi Office Bearer atâna thlan theih zînga mi an ni tûr a ni lo.
4.2.3 Nomination siamin Office Bearer te hi thlan tûr an ni ang. Nomination chu Executive Committee in 17 thleng a siam ang a, inthlan ni-ah mipui lam atangin nomination 3 thleng siam belh theih a ni ang.
4.2.4 Office Bearer atâna nominate te chu Bangalore-a kumkhat tal lo awm tawh leh kum khat dang tal la awm tûr ngei ni se.
4.2.5 Office Bearer tanglai term thar atân thlan nawn leh theih a ni ang a, amaherawhchu, mi pakhatin a hna (post) ngai term hnih aia tam a zawnin a chelh thei lovang.
4.2.6 Office Bearer-te hi secret ballot hmanga thlan an ni ang a, vote hmu tam ber apiang chu tlinga puan an ni ang.
Chapter V: OFFICE BEARER DINHMUN LEH MAWHPHURHNA
5.1 President
5.1.1 BMA hotu ber a ni a, pâwl invawn dân kawngah mawhphurtu ber a ni ang.
5.1.2 BMA meeting (entirnân, General Body Meeting, OB Meeting, Executive Committee Meeting leh a dangte) a kaihruai thîn ang.
5.1.3 BMA thiltih apiang President hmingin a kal thîn ang a; thubuai-hlabuai pawh President hminga kalpui thin a ni ang.
5.1.4 BMA thil neih hawhchhuah phalna pe theitu a ni ang.
5.1.5 A tûl angin Treasurer sum vawn dân a enpui thei ang a, BMA Bank Account ah Treasurer nên hming ziaktu an ni ang.
5.2 Vice President
5.2.1 President puitu a ni.
5.2.2 President awmloh hlân leh theihloh thulah President hna a thawk ang.
5.2.3 Cultural, Games & Sports leh Academic & Human Resources lama hmalakna a lo enpui thin ang.
5.3 Secretary
5.3.1 BMA thiltihah sûlsutu ber a ni.
5.3.2 BMA Meeting-ah report a tûl angin a pê ang a; Minute ziah leh thurêl ûmzuiah mawh a phur ang.
5.3.3 Pâwl tâna thil tûlah Rs. 1,000/- thleng a hmang thei ang a, a sum hman dân chu pawmpui tûrin Executive Committee Meeting-ah a report thîn ang.
5.4 Assistant Secretary
5.4.1 Secretary puih a ngaihna apiangah a pui ang.
5.4.2 Secretary awm loh hlân leh theih loh thilah chuan Secretary hna a thawk ang.
5.4.3 BMA thil neih Article 5.7.2, 5.8.2 leh 5.9.7-in a huam lohte fel taka ziakin a vawng ang.
5.5 Treasurer
5.5.1 Finance Secretary hnen atangin sum a dawng anga. Finance Secretary a awm lohin a ai a awh ang.
5.5.2 Sum a dawn zawng zawng Account bu ah a ziak lût anga, voucher a vawng ang.
5.5.3 Chhinlung Account bu leh General Account bu te hi a hranin a vawng ang.
5.5.4 Bank-ah BMA sum a dahlut thin anga, thla vêng atân Rs.3000/- thleng a kawl thei ang.
5.5.5 BMA Bank Account ah President nen hming ziaktu (signatory) an ni ang.
5.5.6 Thlatin Account a khar anga, a tul angin General Body Meeting leh Executive
Committee Meeting ah sum dinhmun a report thin ang.
5.6 Finance Secretary
5.6.1 Sum a dawn apiang Account bu ah a ziaklut anga, account bu pahnih Chhinlung Account bu leh General Account bu te a hranin a vawng ang.
5.6.2 Sum a dawnin receipt a pe thin anga, a sum dawn te chu Treasurer hnenah a pe lut thin ang.
5.6.3 Treasurer remchanloh thulah a ai a awh ang.
5.6.4 Thlatin Account a khar anga, receipt leh transit book te chhutin balance a lantir ang.
Chapter VI: MEETING CHUNGCHANG LEH MAWHPHURHNA
6.1 General Body Meeting
6.1.1 General Body Meeting hi member pumpui huapa meeting a ni a, thuneihna sâng ber neitu a ni.
6.1.2 Kum khatah vawi khat tal neih tûr a ni a, a tûl dân azirin vawi khat aia tam pawh neih theih a ni ang.
6.1.3 General Body Meeting neih dân tûr leh thu ngaihtuah tûrte chu Executive Committee-in a rêl thîn ang.
6.1.4 Annual General Body Meeting ah hian BMA Office Bearer thlan thin a ni ang.
6.1.5 Kum khat chhûnga BMA hmalakna leh tuldang apiang report a dawng ang.
6.1.6 BMA Audited Account a dawng ang.
6.1.7 Statutory Auditor a ruat thin ang.
6.1.8 Dân siamthat tur awm a piang a ngaihtuah ang.
6.1.9 Annual General Body Meeting inhriattirna hi ni 21 aia tlem lo tur a ni.
6.2 Executive Committee Meeting
6.2.1 Executive Committee member te hi Office Bearers, Executive Committee members,
Patron leh Senior Advisers atana ruatte an ni. Bangalore Mizo Christian Fellowship (BMCF) President leh Secretary te pawh Executive Committee member an ni nghal ang.
6.2.2 Mysore leh Mandya atangin Non Residential Member ni lai pakhat ve ve co-opted member atan koh theih an ni ang.
6.2.3 Executive Committee chu BMA tâna hma latu ber a ni a; thil pawimawh leh lian tham
chu General Body Meeting-ah a thlen thîn ang.
6.2.4 President leh General Secretary inrâwnin Meeting hi koh thin tûr a ni.
6.2.5 A tûl angin Sub-Committee a din thei ang.
6.2.6 Thilneih (bungrua leh hmanrua) enkawl leh hawhchhuah chungchângah leh thil dangah
pawh a tûl angin dân a siam thei ang.
6.2.7 A tul angin Dan tesep te pawh a siam thei ang.
6.2.8 Office Bearer atana thlan a hna thawk theilo tur leh chhunzawm theilo tur aiawhtu tur chu Executive Committee in a tul angin a rel thin ang. Thlan tharin a term hman tur hi thla 6 a tlin chuan a full anga chhiar a ni ang.
6.2.9 Executive Committee chuan Committee member zing atangin Academic & Human Resources incharge, Games & Sports incharge leh Cultural incharge te a ruat thin ang.
6.3 Office Bearer Meeting
6.3.1 Hei hi Office Bearers atâna thlante meeting bîk a ni.
6.3.2 Hruaitu thlan tharten Executive Committee Member turin mi 15 aia tam lo an ruat ang a, Patron pakhat leh Senior Adviser pahnih an ruat bawk ang.
6.3.3 General Body leh Executive Committee ten rel tura an pek a tul angin an bawhzui anga. Hemi bakah hian thil hmanhmawh thlak leh tul bik a rorel an neih chuan Executive Committee meeting hmasaberah pawmpui turin an thlen thin ang.
Chapter VII: ROREL CHUNGCHANG
7.1 Rorêl chu President-in a kaihruai ang a, Secretary-in rorêl thu a ziak fel ang.
7.2 Rorêlnaa thu tihthlûk tawh, chumi rorêl tum vêk chuan ngaihtuah leh theih a ni lovang a; Meeting lehah dân pângngaiin ngaihtuah theih a ni ang.
7.3 Rorel thei chin ‘quorum’ hetiang hi a ni ang:
7.3.1 Annual General Body Meeting-ah 70 chin.
7.3.2 Office Bearer meeting-ah 3 chin.
7.3.3 Executive Committee Meeting ah chuan simple majority ani ang. Thil hmanhmawh thlak leh pawimawh bikah chuan 1/3 (one third) ani ang.
Chapter VIII: SUM LEH BUNGRAW CHUNGCHANG
8.1 Sum
8.1.1 BMA-in kawng hrang hrang atanga sum a dawn hi BMA sum a ni.
8.1.2 BMA sum te hi chi hnihah then a ni anga; pakhatna chu sumpui (general fund) a ni anga, pahnihna chu Chhinlung fund a ni ang. Account bu pawh a hrana vawn tur a ni.
8.1.3 Account endik tûrin Auditor ruat thin tûr a ni.
8.1.4 Sum tihbo leh tihchingpen thuah a enkawltu mawhphurhna a ni a. BMA Executive Committee in a chungthu tha a tih angin a rel ang.
8.1.5 Thil tul leh hmanhmawhthlak bikah chuan President leh General Secretary te inrawnin BMA sum hi Rs.2000/- thleng an hmang thei ang a, an hman dan chu Executive Committee Meeting hmasaberah pawmpui turin an thlen tur a ni.
8.2 Bungrua (Property)
8.2.1 BMA bungruate hian lâksawn theih leh lâksawn theih lohte a huam.
8.2.2 BMA bungruate hi Record Book-ah ziak lûtin fel taka vawn tûr a ni.
8.2.3 BMA bungrua tihbo leh tihchhiat thu ah a enkawltu leh a hmangtu mawhphurhna a ni a; BMA Executive Committee-in tha a tih angin a chungthu a rel ang.
8.2.4 BMA bungrua enkawl leh hawhchhuah dân chu BMA Executive Committee-in a rêl ang a ni ang.
Chapter IX: AMENDMENT CHUNGCHANG
9.1 BMA inkaihhruaina dan hi siamthat ngai ni a hria chuan ziakin Executive Committee-ah a thlen tur a ni.
9.2 Executive Committee-in chu rawtna chu a pawmpui a nih chuan a siamthat te chu pawmpui turin General Body Meeting-ah a thlen ang.
9.3 General Body Meeting-a member kal zatve aia tamin siamthat an duh chauhin Dan hi tihdanglam theih a ni.
INKAIHHRUAINA DAN TESEP
1. BUNGRAW CHUNGCHANG:
BMA Inkaihhruaina Dan bu Chapter VIII ‘Sum leh Bungraw chungchang’ tiha 8.2 ah bungrua chungchang thu a sawi a. Executive Committee meeting Vawi 2-na, 23rd May 2009 a neihin a rel angin heng a hnuai amite hi hawhchhuah theih leh a hawhman te chu a ni ang. Kan Inkaihhruaina danin a sawi angin President chu hawhchhuah phalna pe theitu a ni a (Inkaihhruaina dan 5.1.4). Bungraw hawh dilna hi ziakin President hnenah thehluh tur a ni.
BMA Bungrua hawhtheih leh a hawh man te chu hengte hi an ni (A hawhtheih hun chhung hi hawhni atanga ni thum chhung a ni):
- Kawrchei - Rs.20
- Puanchei - Rs.30
- Thangchhuah Kawr - Rs.20
- Pawndum - Rs.20
- Diar - Rs.10
- Vakiria - Rs.10
- Thi-hna - Rs.20
- Ipte-pui - Rs.10
- Darmang - Rs.10
- Darkhuang - Rs.30
- Mautlawn - Rs.100 (1 set, ie 10 nos)
- Khuang leh a vuakna - Rs.50
- Sealer leh Tensioner - Rs.50
Heng bungruate hi ni thum chhung a pek kir a nihloh chuan nikhatah Rs.50 zel chawi tur a ni ang (Hei hi bungraw hrang hrang a chhiar niloin, nikhat man zel chauh a ni)
2. CHHINLUNG MAGAZINE:
2.1 BMA hian magazine a tichhuak thin a, a hmingah ‘Chhinlung’ vuah a ni.
2.2 BMA Executive Committee-in Chhinlung tihchhuah leh tihchhuahloh tur chungchang a rel thin ang.
2.3 Chhînlung Magazine enkawltu tûr “Editorial Board” hi BMA Executive Committee-in a ruat thar \hîn ang.
2.4 Editorial Board hian hmalakna tura a ruahman te chu Executive Committee-ah a thlen thin ang.
2.5 Magazine tihchhuah leh thehdarh leh account vawn chungchangah mawh an phur ang a, heng hna an thawh dante hi BMA Executive Committee-ah an report ang.
2.6 Chhinlung pual sum hi account bu hrana vawn tur a ni a, sum dang nen chawhpawlh loh tur a ni. Amaherawhchu, tul bikna a awm a nih chuan Executive Committee remtihnain thildang atan hman theih a ni ang.
2.7 Chhinlung Magazine hi copy pahnih (2) aia tlem lo file copy atan dah thin a ni ang a, a soft copy pawh dah that a ni ang.
3. BMA AW
3.1 BMA in kartina vawikhat chhuak turin BMA Aw a chhuah thin ang.
3.2 BMA Aw enkawl tur hian Executive Committee-in Editorial Board a ruat thin ang a, an enkawl hun chhung tur pawh a ruat thin ang.
3.3 BMA Aw hi man neia hralh chhuah a ni ang a, a buatsaihna sênso te pawh mahni intum (self-reliant) thei tûra ngaih a ni. Enkawltu tûra ruat ten Account fel takin an vawng anga, an account chu endik thin a ni ang.
3.4 Editorial Board hian file an vawng anga, BMA Aw chhuak apiang copy hnih (2) tal an dahtha thin tur a ni. An term tâwpah BMA Executive Committee-ah Account leh file leh thil \ûl dangte an thehlût \hîn ang.
3.5 BMA Aw-a thuchhuah tûr hi Editor-in uluk takin a enfiah \hin tûr a ni a. Inpumkhatna tichhe thei thil leh mimal inchirhthehna lam chi rêng rêng tihchhuah tûr a ni lova, \awngkam thalo hman loh tûr a ni.
4. BMA WEBSITE: (ECM Vawi 8-na, Nov. 4th, 2006 leh Vawi 9-na Dec.16th, 2006)
4.1 BMA hian Mizo kan inpumkhat na atan leh chanchin kan inhriattawnna atan te, midangten kan chanchin an lo hriat theihna turin website a siam a, a hmingah ‘www.bangaloremizo.info’ tih a ni.
4.2 BMA Executive Committee-in website enkawl tur hian ‘Web Team’ a ruat thin ang.
5. CHHIATNI LEH THATNI CHUNGCHANG:
5.1 Chhiatni thu: Hei hi member leh member niloten chhiatna an tawh buaipui chungchang a ni.
5.1.1 BMA member a thih chuan kuang man atan BMA in Rs.5000 a tumsak ang.
5.1.2 Bangalore khaw chhunga phum tur emaw, hmundanga phum tur emaw a nihin BMA-in a tul angin a buaipui ang.
5.1.3 BMA member niloin chhiatna a tawh chuan a buaipui chungchangah BMA hruaitute inrawnin tha an tih angin hma lak a ni ang.
5.2 Inhriattirna Chungchang: Harsatna tawk an awm chuan BMA President leh Secretary te hriattir tur a ni.
5.3 Thatna lam thil: Hei hian BMA member inneihna te, zirna leh hnathawhna lam leh thildangte a huam.
5.3.1 Inneihna: Kohhran Dan Thianghlim/Biakin hawng a Innei an awm a nih chuan Rs.1000/- chin lawmpuina pek a ni ang.
5.3.2 Zirna: Zirna a First Division a tling chin an nih chuan chawimawina Certificate pek a ni ang.
5.3.3 Mi, a hnathawh leh thiltiha chawimawi tlak te chungchang chu a tul anga ngaihtuah a ni ang.