Keimahni

BANGALORE MIZO ASSOCIATION

Bangalore Mizo Association (BMA) hi Bangalore-a awmte Chhinlung chhuak, Mizoten kan zirna emaw kan hnathawhna hmunah Mizo hnam nun leh zia vawn kawngah kan hlawhtlinna kawnga hmahruaitu atan Bangalore Mizo Association hi kum 1984 din a ni. BMA hian motto a nei a, chu chu saptawnga dah a ni: PERCEPTION, PERSEVERANCE, PERFECTION tih a ni. Thil chinchang fiah taka thlir leh hmuh dan thiamna te, mahni hmaa tihtur leh thawhtur awmte hlen tura taimakna leh thahnemngaihna tela beih chiamna te leh engkim fel fai leh tha thei ang bera tih tumnate an ni. He motto anga nun hmang leh Mizo tlawmngaihna nena chawhpawlha khawsa nun duhawm tak tak BMA memberte an awm chho mek zel a ni.
 

  BMA thil tumte:

1. Bangalore-a Mizo awmte inkungkaihna leh inpumkhatna tinung zel turin.

2. Mizo hnam nun mawi leh zia (culture) chhawm nung zel tur leh a tul anga infuih/inzilh tawn ruin.

3. Mizo hnam nunzia (culture) tihlarna kawnga hmahruai turin.

4. Mizo zinga harsatna tawkte intanpuitawn tur leh chhiatni/thatni a inphungbawm thin turin.

5. Mizo ten kan tihtur theuh kan tihna kawnga a tha thei ang bera kan tih theuhna tura kaihruai turin.

Tun hnaiah hian Bangalore khawpuia awm si, BMA member atana inpe lo engemaw zat an awm tih hriat a ni a. Hengmite pawh hi BMA member ni ngei turin fuih leh ngen an ni. A tawp khawkah chuan kan Mizopuite bak hi belh tur an awm lo tih kan hriat chian pawh a tul awm e.

BMA hi Karnataka Societies Registration Act dan anga register a ni a. He pawl a din tirh atangin Registered address: United Theological College, 63 Millers Road, Bangalore 560 046 a ni.

Bangalore khawpuia awmte chauh hi BMA member ni thin chu kum 1992 vel atang khan phelh dul a ni a, Bangalore chhehvel, entir nan, Mysore a awmte pawh member anga ziah luh an ni ve ta zel a. Non-resident member tia vuah an ni thung. Chutiang chuan hun a lokal zel a, Karnataka hmun dang-Devangere te leh Mandya bakah Tamil Nadu leh Andhra Pradesh thlengin membera rawn inpe an awm ta zel a. Non-resident member nih theih dan hi fel zawka ruahmanna kum 1996 atanga siam a ni bawk. Tun hnaiah erawh chuan Bangalore khawbul hnai vai amite chauh hi an lo tel ve ta zawk a ni.

Chutichuan, BMA chu Bangalore khawpui leh a chhehvel khawlian deuhva Mizo awm tawh phawt tan chuan Mizo khawtlang thil engkima hnarkaitu leh uaptu ber a ni chho ta zel a, chhiatni leh vanduaina kawng hrang hrang thleng karah Mizote baihvai lova siamtu, hruaitu tling a ni chho ta zel a ni.
 

  Chhinlung Magazine:

Bangalore Mizote hmun danga awmten an hmelhriatna pawimawh ber ni fo chu BMA-in Chhinlung Magzine a tihchhuah thin hi a ni a. Chhinlung Magazine hi kum 1989-90 khan Chhinlung Magazine volume 1-na tihchhuah tan a ni a, Bangalore Mizo Association website tihchhuah kum chiah, 2006-07 hian kum 18-na ( Volume XVIII ) a chhuak a ni. Kum 1993-94 a chhuak, Chhinlung Magzine ( Vol.V ) phei chuan Mizoram Magazine Thaber lawmman a dawng nghe nghe a. Hei hi Information and Public Relations Directorate huaihawt a ni. Lawmman Rs. 10,000/- a keng tel bawk a ni. Chhinlung Magazine hian danglamna bik tak a neih fo thin (unique selling proposition) chu: engemaw thupui thlanchhuah bik ril leh chipchiar taka chai a nei thin a. Sawihona ( panel discussion ) leh a thlawptu thuziak a keng tel ziah thin a. Kum 1991-92 atang phei chuan THU THLUR BING tih hming chawitir a ni ta nghe nghe a.
 

  BMA Directory:

Kum 1988-89 vel atang khan BMA hian directory a siam chhuak a chu chu tun thlengin kum tina chhunzawm a la ni zel a. Directory hi a tangkai hle a, memberte chiang zawka kan inhriat pawhna a nih avangin inlaichinna tha tak thlentirtu a ni nghal a. Tin, kum tam tak ral hnuah pawh chhiatni-thatni thlenga in chhui chhuah nante a lo tangkai khawp mai. He directory-ah hian memberte hming bakah inkaihhruaina leh thubengvarthlak tam tak khung tel a ni a. Bangalore Mizote tan chuan neih makmawh a ni.
 

  BMA Hla:

BMA hian hla duhawm tak a nei a. A phuahtu: Tv. K. Lalrinmawia ( Kungi Pa ), tuna Rev. K. Lalrinmawia hi kum 1990-91 BMA President a ni. BMA thiltia kalkhawm apiangin he hla hi hlim takin memberten an sa thin.

Bana chelh reng mai ka nuam mang e,
Lore khawpui zofa insuihkhawm pawl;
Awithangpa dungthul zia chawiin,
Rial ang ral kan phallo, BMA.

Engtin lo ngai che u maw?
Mahriak ramtian run rem thin kha,
In sulhnu chhui BMA ding hi
Zonun parfung chawi tum kan ni e

Officer leh thiamzir naufate,
An suihlung rualna chu BMA;
Sang bik reng an awm lo zofate,
Siamtu lunglai dum hian an mawi e.

Nau ang kan nuiza milian leh te,
Bana vuanin zonunmawi kan chawi;
Mizo sakhming zahpui lo ila,
Anpai hringmi zaleng dang tawnah.

  BMA website:

BMA Executive committee (November 2006) thurel bawh zuiin website thar nei tura hma la turin Core Team a siam nghal a. Chuta memberte chu: Pu Joshua Lalrempuia te, Pu R.Lal Rinawma IRS (anni pahnih hi kum 2003-a mumbaimizo.org website lo dintute an ni a ) te, Tv. James CVL Thafamkima te, Tv. Pawsa Lava leh Tv. Madawnga Hauhnar te an ni. Anni hian chak takin hma an la nghal a, professional designer ruaiin an buatsaih nghal a. He website thar hi January ni 1, 2007 BMA Day-a launch a ni.
 

  BMA chetna langsar zualte:

A hma lama tarlante bakah BMA hian kumtina hmalakna leh hnathawh a neih thinte chu: Freshers’ Social te, Vangpui Kut lawmna te, BMA Day lawmna leh Parting Social te a ni a. Tin, kum 1985 atanga an lo tan tawh: NULA FEL leh TLANGVAL FEL thlanna kum tin an nei thin a. FEL Trophy Pu H.T. Sangliana thawh chu an inhlan chhawng a. Thlante hming leh thlan kum trophy-ah hian chhinchhiah zel a ni. Hmun ziahna a khah hunah Mizoram museum-a dah tura ruahman a ni. Heng chetna (activities) hrang hrangte neih hun turhi kum tir lamah committee-in programme calendar fel tak a siam thin.
 

  BMA leh BMCF:

Bangalore Mizo Christian Fellowship (BMCF) hi Bangalore Mizo khawtlang thlarau nun lama kaihruaitu pawl, kum 1975 a din a ni a. Hei hi Mizo Inkhawm tia koh theih tho a ni a. Hetah hian kohhran hrang hrang vuantute fuan khawmin, intihhranna leh inthliarna awm lovin leh lungrual takin Pathian biak hona maicham a awm a ni. Chawlhni tina inkhawmna awm hian Mizo khawtlang inpumkhatna leh insuihfinna duhawm tak a thlen a ni. Hruaitu duhawm tak takte nei thinin tun thleng hian khawtlang thil thlenga BMA nen inmil tha taka inhmui chho zel a ni. Bungrua leh thil neih engkimah inpawt tawnin lungrual takin he pawl pahnihte hi an kal chho mek a ni.
 

  BMA Hruaitute:

Kum 2008-09 chhung a BMA office bearers:

  Executive Members Dangte:

Patrons: Dr. HT Sangliana (MP), Pu B. Kapthuama (IAS Retd).

Senior Advisers: Pu R. Lal Rinawma (IRS), Dr. Lalrinawmi Ralte, Pu PS Chhuasa.

BMCF Representatives: Rev. Dr. K. Sapthanga, Rev. C. Vanlaldika.

Committee members: Pu Levis K. Lalsiamliana, C. Lalhmachhuana, C. Lalrinfela, Amos Lalremtluanga, Solomon Lalhminghlua, Benjamin Rualthanzauva, Pu Zoramthanga, H. Lalnunfela, Francis Lallawmawma, Pawsa Lava, Liana VT Vuangtu, Zodinliana Khiangte, Lalmuansangi, Vanlalchhuani, Pi Lalrinpuii, Mysore Representative: R. Vanlalmalsawma, Mandya Representative: Jerry R. Lalnunthara.

  Tun hma lama BMA hruaitute hming list a download theih e.  
BMA Hruaitute
 

  Bangalore Mizote pun dan [ source: BMA directory ]:

• Kum 1984-85 member inziak zat: record en tur awm lo
• Kum 1989-90 member inziak zat: 144 [ hnathawk: 6 ]
• Kum 1992-93 member inziak zat: 269 [ hnathawk: 8 ]
• Kum 1995-96 member inziak zat : 272 [ hnathawk: 12 ]
• Kum 1999-00 member inziak zat: 348 [ hnathawk : 23 ]
• Kum 2004-05 member inziak zat: 666 [ hnathawk: 92 ]
• Kum 2005-06 member inziak zat: 743 [ hnathawk: 134 ]
• Kum 2006-07 member inziak zat: 880 [ hnathawk: 172 ]

Note:

1. Heng memberte hi non-resident memberte tiamin

2. Member tam tak ( a bikin ordained minister-te ) hi hnathawk chunga zirlai an nih that leh avangin hnathawk anga chhiar tel an ni lo

Top ▲